Basha në Asamblanë e KiE, takohet me kreun e Kuvendit të Ukrainës

Kreu i Partisë Demokratike, Lulzim Basha, ndodhet këtë të martë në Këshillin e Evropës ku do të marrë pjesë në seancën ku do të votohet mbi anëtarësimin e Kosovës në këtë organizatë, por dhe mbi propozimin e tij për konfiskimin e aseteve ruse që do të përdoren për rindërtimin e Ukrainës.

Në nisje të seancës Basha ka ndarë ne rrjete sociale një foto me kryetarin e Parlamentit të Ukrainës, Ruslan Stefanchuk. Kryedemokrati shpreh mbështetjen për Ukrainën teksa thotë se një fitore e Kievit është një fitore e demokracisë.

“Kënaqësi që në prag të nisjes së diskutimit në Asamblenë Parlamentare të Këshillit të Europës për Rezolutën për Rindërtimin e Ukrainës të takoja kryetarin e Parlamentit ukrainas, Ruslan Stefanchuk.

Diskutuam situatën atje dhe nevojën për të shtuar përpjekjen në ndihmë të Ukrainës. Fitorja e Ukrainës jo vetëm që do të fuqizojë kauzën e demokracisë, por gjithashtu do të rrisë sigurinë evropiane.

Me shprehu mirënjohjen e vendit të tij për rezolutën e paraqitur prej meje.

Jam i lumtur që m’u dha mundësia që edhe Shqipëria të japë një kontribut të rëndësishëm për krijimin e mekanizmit përmes të cilit Rusia sot dhe çdo agresor i mundshëm në të ardhmen, të mbahet përgjegjës edhe financiarisht për krimet dhe dëmet e shkaktuara.

Uroj që ky kontribut edhe në emër të Shqipërisë të vendosë standardet për të sotmen dhe të ardhmen, duke i shërbyer paqes dhe sigurisë në botë”, shkruan Basha.

LEXONI GJITHASHTU:

• Kreu i PD: Ja pse PS nuk e diskuton amendamentin “Basha” për ndihmë ndaj Kosovës
• Basha nga Këshilli i Evropës: Nis java e vendimeve të mëdha