Presidentët e 11 Federatave të Futbollit mblidhen në Tiranë

Ditën e sotme në Tiranë, në selinë qëndrore të Federatës Shqiptare të Futbollit, janë mbledhur 11 federata anëtare të UEFA-s nga Europa Juglindore.

Përmes një postimi, FSHF bën të ditur se ky takim ishte në kuadër të Mbledhjes Strategjike të Federatave anëtare të UEFA-s.

Po ashtu, të gjithë pjesëmarrësit shprehën njëzëri mbështetjen e palëkundur për Presidentin Ćeferin dhe administratën e UEFA-s.

Njoftimi i FSHF:

Njëmbëdhjetë federata anëtare të UEFA-s nga Europa Juglindore u mblodhën sot në Tiranë, në selinë qëndrore të Federatës Shqiptare të Futbollit, për Mbledhjen strategjike të Federatave anëtare të UEFA-s.

E mikpritur nga Presidenti i FSHF-së dhe zëvendëspresidenti i UEFA-s, z. Armand Duka, mbledhja u fokusua në aspekte kritike të strategjisë së UEFA-s për zhvillimin e futbollit si: formati i ardhshëm i garave të klubeve të UEFA-s pas vitit 2024 dhe programi i ri shoqërues i solidaritetit, diskutimet mbi çështjet e arbitrazhit dhe zhvillimet e ardhshme, krahasimi i të dhënave e analizat në fushën sportive dhe financat dhe eksplorimi i sistemeve të basteve dhe mundësive në zhvillim për vendet pjesëmarrëse.

Pjesëmarrës në këtë mbledhje ishin përfaqësues nga 11 federata kombëtare të futbollit, duke përfshirë Bosnje-Hercegovinën, Kroacinë, Qipron, Greqinë, Kosovën, Malin e Zi, Maqedoninë e Veriut, Serbinë, Slloveninë, Turqinë dhe Shqipërinë.

Pas prezantimeve të këtyre temave, federatat pjesëmarrëse u thelluan në diskutime në lidhje me të ardhmen e futbollit europian, ku të gjithë pjesëmarrësit shprehën njëzëri mbështetjen e palëkundur për Presidentin Ćeferin dhe administratën e UEFA-s.

LEXONI GJITHASHTU:

• A janë shpërndarë të gjitha biletat për kombëtaren në Euro 2024? Flet kreu i FSHF
• Kualifikimi, kundërshtarët dhe pritshmëritë për Euro 2024, rrëfimi i kreut të FSHF