24-vjeçari i prekur me Covid-19 hidhet nga kati i tretë i spitalit në Elbasan

Një 24-vjeçar i diagnostikuar pozitiv me Covid-19 është vetëhedhur nga kati i tretë i spitalit të Elbasanit.

Burimet paraprake konfirmojnë për Euronews Albania se i riu ka marrë dëmtime të shumta, por fatmirësisht mësohet të jetë jashtë rreziku për jetën.

Ky nuk është rast i izoluar në Shqipëri. Në spitalet e cilësuara si Covid në Tiranë pesë persona i kanë dhënë fund jetës duke u vetëhedhur nga katet e spitaleve.

Më herët ekspertë të shëndetit mendor dhe psikologë kanë ngritur alarmin se duhet bërë më shumë për të parandaluar ngjarje të tilla të rënda në ambientet e spitaleve COVID, duke ofruar shërbim të specializuar psikologjik për këta pacientë, pasi sipas tyre impakti i virusit është shumë i madh jo vetëm në shëndetin e tyre fizik, por edhe atë emocional.

Policia dhe grupi hetimor ndodhen në terren për të përcaktuar shkaqet, të cilat detyruan të riun të ndërmerrte një akt të tillë.