Fatmir Xhafaj analizon reformën në drejtësi dhe pse pati vonesa në ngritjen e institucioneve

Në një intervistë me gazetaren Ilva Tare në Euronews Albania ish-ministri i Drejtësisë Fatmir Xhafaj analizoi reformën në drejtësi, e cila sipas tij i ka sjellë vendit mundësinë që tashmë vendi “të mos ketë më demokraci të cunguar”.

Kur kanë kaluar pesë vite nga votimi me 140 vota i nisjes së reformës, ende nuk janë ngritur të gjitha institucionet e reja, mes të cilave Byroja Kombëtare e Hetimit. Por Xhafaj tha se “një reformë e tillë nuk ka qenë aspak e lehtë”. Në këtë pikë ai tha se ka pasur vonesa kryesisht nga opozita.

“Nga 140 votat e famshme u desh të miratoheshin 7 ligjet, pastaj 30 ligje […që i bëtë pa PD-në! – ndërhyri Tare], jo PD nuk donte t’i votonte dhe kur u gjend në presion e votoi ligjin për SPAK-un, por jo 6 ligjet e tjera,” – tha Xhafaj duke pretenduar se PD donte ta votonte procesin e reformës, në veçanti vetingun.

“Ju e dini se çfarë ndodhi, PD hyri në çadër, u vonua miratimi i komisioneve të vetingut, çoi çështjen në Gjykatë Kushtetuese, e çuan në Venecia,” – u shpreh Xhafaj.

I pyetur për pretendimet e Presidentit Ilir Meta për ndërhyrje nga qeveria aktuale në reformën në drejtësi aq sa ai ta quajë atë “Ramaforma”, Xhafaj u përgjigj se “për çdo pretendim ai duhet t’i drejtohet organeve”.

Xhafaj këmbënguli se me reformën tashmë qeveria nuk ndërhyn dot më në sistemin e drejtësisë. Ai kujtoi se me sistemin e shkuar Presidenti do të ishte kryetar i Këshillit të Lartë të Drejtësisë, ministri i Drejtësisë do të ishte anëtar i këtij këshilli ndërsa anëtarët e tjerë do të zgjidheshin nga mazhoranca dhe opozita. Thënë këtë ai shtoi se aktualisht Këshilli është formuar pas një votimi në parlament i disa listave të ardhura përmes një konkurrimi.

Ish-ministri i Drejtësisë këmbënguli se tashmë me reformën “sistemi ka pavarësinë institucionale”. Ai tha se nga pikëpamja e pavarësisë Gjykata Kushtetuese aktuale është më e mirë se sa ajo që kishim.

“Për mënyrën se si ata vijnë sot në radhët e Gjykatës Kushtetuese, sot anëtarët vijnë përmes Këshillit të Emërimeve në Drejtësi, ndërsa më parë duhej bërë një marrëveshje dyshe me Presidentin dhe mazhorancën, nëse nuk merrje miratimin e të dyve, nuk mund të shkoje anëtar i Gjykatës Kushtetuese,” – analizoi Xhafaj.

Më tej ish-ministri tha se ndryshimet e bëra së fundmi për ligjin e SPAK-ut “bëjnë ndryshime të parëndësishme që nuk e prekin thelbin”, ndaj dhe u rend të bëhej që gjatë kësaj legjislature dhe jo pas 25 prillit. Xhafaj tha se ligji u ndryshua për të shkarkuar nga mbingarkesa e çështjeve SPAK-un.

Lexoni gjithashtu:

“Mos ia dorëzoni fuqinë tuaj kriminelëve”, ish-ministri Xhafaj komenton apelin e ambasadores Yuri Kim

Cila është arritja dhe pendesa më e madhe në karrierën politike? Përgjigjet Fatmir Xhafaj

Renditja në listën e kandidatëve, Fatmir Xhafaj: I gatshëm të pranoja kandidimin edhe si i 31-ti