Vdekja e George Floyd, nis gjyqi ndaj oficerit Derek Chauvin, përplasje avokat-prokurori

Familja e George Floyd dhe avokatët e tyre u gjunjëzuan të hënën në kujtim të tij jashtë gjykatës së Mineapolisit, në prag të procesit gjyqësor ndaj policit që i vendosi gjurin në qafë, duke i marrë jetën.

Benjamin Crump, avokat i familjes Floyd, deklaroi se ky është një moment i rëndësishëm në historinë e Amerikës, pasi e gjithë bota po vështron.

Ndërkohë, në sallën e gjyqit, avokati i Derek Chauvin deklaroi se ish-oficeri kishte ndjekur me përpikmëri taktikat e mësuara në akademinë e policisë.

Eric Nelson citoi përdorimin e drogës nga Floyd dhe skenën kaotike gjatë arrestimit, duke thënë se ndërhyrjet e kalimtarëve shkaktuan zhvendosjen e vëmendjes së agjentëve nga zoti Floyd.

“Derek Chauvin bëri saktësisht atë për të cilën është stërvitur gjatë karrierës së tij 19-vjeçare. Përdorimi i forcës nuk është optimal, por është një aspekt kyç i punës së policisë”, u shpreh Eric Nelson, avokat i Derek Chauvin.

Nga ana tjetër, prokurori i çështjes i tha anëtarëve të jurisë se oficerët që veshin uniformën e policisë së Mineapolisit zotohen që të mos përdorin forcën kur është e panevojshme.

“Ne kemi hapur këtë çështje ndaj zotit Chauvin për përdorimin e tepruar të forcës që ai zbatoi ndaj trupit të George Floyd. Për përfshirje në një veprim që ishte i rrezikshëm, por që ai e aplikoi pa marrë parasysh impaktin në jetën e zotit Floyd”, tha Jerry Blackwell, prokuror i shtetit të Minesotës.

Chauvin, 45 vjeç, është vetëdeklaruar i pafajshëm për vrasje dhe keqtrajtim dhe avokatët e tij argumentojnë se ishte një sasi droge, të cilën Floyd gëlltiti për t’ua fshehur agjentëve, ajo çka shkaktoi vdekjen e tij. Megjithatë, nëse shpallet fajtor, ish-oficeri rrezikon deri në 40 vjet burg.

Vrasja e George Floyd shkaktoi protesta në mbarë botën, me moton Jetët me Ngjyrë kanë Rëndësi.

Lexoni gjithashtu:

“Jo racizmit!”, protestat për vdekjen e George Floyd mbërrijnë edhe në Europë

Si nxiti vdekja e George Floyd lëvizjen e protestave?