Kremlini ekspozon pajisjet ushtarake perëndimore të kapura gjatë luftës në Ukrainë

Një ekspozitë e pajisjeve ushtarake perëndimore të marra nga forcat e Kievit gjatë luftimeve në Ukrainë u hap më 1 maj në kryeqytetin e Rusisë, në Moskë.

Ekspozita e organizuar nga Ministria Ruse e Mbrojtjes përfshin mbi 30 pjesë të pajisjeve të rënda ushtarake të prodhimit perëndimor, përfshirë një tank luftarak M1 Abrams të prodhuar nga SHBA-ja, një automjet luftarak të blinduar Bradley, një tank Leopard 2, një automjet të blinduar këmbësorie Marder nga Gjermania dhe një automjet të blinduar AMX-10RC të prodhimit francez.

Ekspozita, e cila do të qëndrojë e hapur për një muaj në një vend përkujtimor të Luftës së Dytë Botërore, në perëndim të Moskës, përmban edhe armë zjarri, letra ushtarake dhe dokumente të tjera të ndryshme.

Autoritetet ruse kanë kritikuar furnizimet me armë dhe pajisje ushtarake perëndimore për Ukrainën, duke i cilësuar ato si dëshmi të përfshirjes së drejtpërdrejtë të NATO-s në konflikt.

Presidenti rus, Vladimir Putin, ka deklaruar vazhdimisht se furnizimet ushtarake perëndimore për Kievin nuk do të ndryshonin rrjedhën e konfliktit dhe nuk do ta pengonin Rusinë të arrijë qëllimet e saj.

Ekspozita vjen pasi forcat ruse kanë arritur të fitojnë më shumë terren në Ukrainën lindore, duke përfituar nga vonesat në ndihmën ushtarake të SHBA-së për ushtrinë ukrainase.

LEXONI GJITHASHTU:

• Vërshimet në Rusi, Kremlini paralajmëron rritje të nivelit të ujërave
• Kremlini e pranon për herë të parë se Rusia është në luftë me Ukrainën