“Blindohet” qyteti i Malmos, agjentë të armatosur për sigurinë e Eurovision

Agjentë të armatosur të policisë janë vendosur në qytetin suedez të Malmos për festivalin e këngës Eurovision, që mbahet këtë javë.

Një raport i policisë i publikuar më herët gjatë muajit vuri në dukje kërcënime për sigurinë e eventit, përfshirë sulmet kibernetike.

Gjithashtu ka shqetësime për protesta të mundshme kundër pjesëmarrjes së Izraelit për shkak të luftës në Gaza.

Vetë kreu i shërbimeve sekrete izraelite, SHIN BET kreu javën e kaluar një vizitë në Malmo, për të mbikëqyrur nga afër situatën.

Niveli i sigurisë në Suedi është rritur edhe për shkak të tensioneve të krijuara vitin e kaluar nga djegia e Kuranit, që e kthyen vendin nordik në “objektiv prioritar” për terroristët.

Artistët që përfaqësojnë 37 vendet pjesëmarrëse këtë vit në Eurovision mbërritën në Malmo të hënën.

Ata parakaluan në tapetin e kuqërremtë për të hapur eventin në prag të gjysmëfinales së parë, që mbahet të martën.

Këtë vit festivali përkon me 50-vjetorin e fitores së grupit Abba në vitin 1974, me “Waterloo”.

LEXONI GJITHASHTU:

• Përmend sulmin e Hamas, Izraeli pranon të ndryshojë tekstin e këngës për Eurovizion
• “Zemrën n’dorë”, Besa Kokëdhima përfaqëson Shqipërinë në Eurovizion 2024