Vaksinimi masiv, Ogerta Manastirliu: Këtë javë vijnë 7.000 doza të Pfizer

Mëngjesin e sotëm, ministrja e Shëndetësisë dhe Mbrojtjes Sociale, Ogerta Manastirliu ka ndjekur nga afër fillimin e procesit të vaksinimit të të moshuarve në “Sheshin Skenderbej”.

Manastirliu ka bërë me dije se brenda muajit prill do të vijnë edhe 20 mijë doza të vaksinës Pfizer.

“Presim nga kontrata me kompaninë Pfizer të kemi sërish përgjatë muajit prill rreth 20 mijë doza. Brenda javës së parë presim 7 mijë dozat e para, e më tej deri në datë 19 prill 20 mijë doza. Ndërkohë që presim që të lëvrohen edhe sipas kalendarit të lëvrimit dhe pjesa tjetër e dozave Sinovac”, u shpreh ministrja.

Duke falënderuar ekipet e vaksinatorëve, ajo tha se janë përgatitur për të rritur numrin e vaksinimeve.

“Fakti që për tre ditë radhazi kemi kryer mbi 50 mijë vaksinime tregon që kapacitetet tona janë të mjaftueshme. Por, sigurisht jemi përgatitur që të rrisim numrin e vaksinimeve nëpërmjet kapaciteteve tona të burimeve njerëzore, të cilat tashmë i kemi trajnuar dhe i kemi futur edhe në forcë”, tha Manastirliu.

Ministrja e Shëndetësisë u shpreh se procesi i vaksinimit do të vijojë në qendrat e përqendruara, por edhe qendrat shëndetësore kudo në vend.

Lexoni gjithashtu:

Deri tani 78 mijë injektime, vijon në ditën e dytë vaksinimi masiv në sheshin “Skënderbej”

Vaksinimi masiv, të moshuarit mbi 75 vjeç marrin dozën e parë të “Sinovac”