“Martesë me kushte”, vepra e Dario Fo në skenë në kuadër të sezonit turistik

“Martesë me kushte” e shkrimtarit të njohur italian Dario Fo është shfaqur të enjten për artdashësit kolonjarë nën lojën e aktorëve Gazmend Gjoka dhe Olta Daku me regji të Altin Bashës.

Shfaqja edhe për shkak të subjektit që trajton ka patur në sallë një publik të rritur, pjesë e cila flet për një marrëdhënie krejt ndryshe nga çfarë është mësuar familja tradicionale shqiptare. Gazmend Gjoka shprehet se realiteti shqiptar nuk është i gatshëm ende për martesat e hapura.

“Është shfaqja që flet për marrëdhëniet në çift, që shoqëria është e ndërgjegjësuar për episodet që ndodhin në familjet shqiptare, është shfaqje që bën jehonë e mesazhet që jep ndikon në përmirësim. Varet nga koncepti që personazhi e përdor çiftin e hapur. Çift i hapur është justifikim që personazhi kryesor e maskon veprimtarinë jashtë familjes e nuk është modeli i duhur për familjen shqiptare. Një çift padyshim do ketë krizat e veta në familje por kurrë nuk duhet të shkojë në konflikt jo vetëm për shkak të dy prindërve por edhe të fëmijëve”,-tha Gazmend Gjoka, aktor.

Aktorja Olta Daku megjithëse ka ardhur dhe herë të tjera në qytetin e vogël në juglindje të vendit, pritja e ngrohtë e publikut kolonjar është befasia me e madhe e saj.

“Jam e lumtur që ndodhem këtu në Ersekë. Faleminderit shume publikut aq të dashur, na bëri që shfaqja të dukej sikur po e jepnim për herë të parë. Për mua është hera e 4 që vij këtu, dua të vij në këtë vend të mrekullueshëm, faleminderit te gjithëve për mikpritjen”,-u shpreh aktorja Olta Daku.

Në Kolonjë me këtë shfaqje është çelur sezoni i ri turistik, i cili do të pasojë në ditët në vijim me dhjetëra aktivitete të tjera.

LEXONI GJITHASHTU:

• Tradita e “Valljes”, Begaj në Kalabri: Diversiteti kulturor, burim harmonie
• Java e Kulturës Greke në Gjirokastër, qyteti i gurtë nën tingujt e muzikës korale