3.500 fansa në Eurovision, lejohet prania e spektatorëve në festivalin muzikor të vitit

Rreth 3.500 fansa do të mund të ndjekin festivalin e këngës Eurovision. Leja është dhënë nga autoritetet holandeze, pas një testi të kryer lidhur me sigurinë e spektatorëve.

Eventi vjetor i muzikës do të mbahet në arenën “Ahoy” të Roterdamit në muajin maj, pas anulimit të vitit të kaluar.

Në kuadër të planit, arena do të jetë gjysmë e mbushur dhe të pranishmit do të duhet të kenë një test negativ përpara se të hyjnë.

Organizatorët e Eurovisionit e mirëpritën vendimin dhe thanë se do të shqyrtojnë të gjitha opsionet e mundshme.

Ata deklaruan gjithashtu se në javët e ardhshme do të japin më shumë detaje mbi mënyrën se si do të garantojnë sigurinë shëndetësore të fansave.

“Siguria shëndetësore e pjesëmarrësve mbetet prioriteti ynë kryesor dhe të gjithë artistët dhe delegacionet që i shoqërojnë do të ndjekin një protokoll të rreptë”, thuhet në një deklaratë.

Njoftimi vjen pas një testi ku u përfshinë 1.500 persona në një festival muzikor të mbajtur në mars në afërsi të Amsterdamit dhe pas ndeshjes së kombëtares holandeze për kualifikimet për Kupën e Botës të mbajtur ditën e shtunë, ku u lejuan 5 mijë spektatorë.