Strategjitë e partive në zgjedhje, analistët: Fushatë e qetë, ka mungesë alternative

Prej një jave ka nisur zyrtarisht fushata dhe partitë politike kanë ndezur motorët për të marrë votën e qytetarëve në zgjedhjet e 25 prillit. Dy partitë më të mëdha kanë zgjedhur taktikat e tyre elektorale të komunikimit publik.

Në kampin socialist, kryeministri Rama po i zhvillon takimet në grupe më të ngushta duke u përqendruar tek dy shtylla, vaksinimi dhe rindërtimi. Ndërsa në kampin tjetër, atë blu, krye demokrati Basha po zhvillon fushatë me prezencë të simpatizantëve në takime.

Për analistin Neritan Sejamini, fushata e parlamentareve të këtij viti nuk ka shumë ndryshime nga fushatat e tjera.

 “Më duket një fushatë relativisht e qetë, e prisja më të ashpër. Është një fushatë tipike shqiptare. Nuk ka asgjë të re në komunikimin publik, nuk ka asgjë të re në truqet elektorale”, u shpreh z. Sejamini.

Ndërsa për analistin, Adrian Thano nuk ka alternativë të re për qytetarët.

 “E kanë humbur moralin për të qeverisur edhe mazhoranca e cila është në pushtet, po nuk e ka moralin për tu rikthyer në pushtet opozita. Në këtë fushatë mungon alternativa e majtë reale”, tha z. Thano

Të dy analistët tregojnë se kryeministri Rama po përdor në fushatë vaksinimin e qytetarëve.

 “Epideminë e ka në qendër të fushatës së tij dhe ai e portretizon veten si një njeri që po na shpëton nga kjo e keqe e madhe e natyrës, që kujdeset për shëndetin tonë,” u shpreh z. Sejamini.

 “Nuk ka politikanë në botë që nuk do ta shfryzëtonte situatën e pandemisë për të marrë vota edhe Rama nuk bën përjashtim aspak nga ky trend. Sa për rindërtimin, betoni është me siguri, pika më e fortë e rilindjes”, tha z. Thano.

Ndërsa fushatën me mitingje të kryedemokratit Basha, Sejamini e shikon si një zgjedhje për të treguar se rotacioni është i pashmangshëm.

 “Zoti Basha ka nevojë që të tregojë që ka frymë në publik dhe fryma tregohet kur ka shumë njerëz që të vijnë nga mbrapa, që brohorasin dhe që janë entuziast”, u shpreh z. Sejamini.