Kur dhe sa do të rriten pagat për 130 mijë punonjësit e administratës në vend

Punonjësit e administratës do të përfitojnë rritje të pagave nga muaji korrik. Shtesat që ata do të marrin arrijnë deri në 35%.

130 mijë punonjës do të përfitojnë rritje të pagës në muajin korrik. Vendimi prek pothuajse të gjithë punonjësit e administratës, me kategori që do të marrin shtesa nga 7% deri në 35%.

Kështu, punonjësit e shëndetësisë, të cilët vitin e kaluar morën rritje nga 3500 deri në 6.000 lekë/muaj, këtë vit do të marrin 15 mijë deri në 20 mijë lekë shtesë.

Kjo do të sjellë për mjekët një rritje kumulative page në 131 mijë lekë në muaj, ndërsa për infermierët 87 mijë lekë në muaj.

Edhe mësuesit do të përfitojnë rritje 30%, duke çuar shumën bruto nga 75 mijë lekë deri në 105 mijë lekë.

Rritje të pagave do të ketë edhe për punonjësit e bashkive, duke synuar ngushtimin e hendekut që ekziston midis kësaj kategorie dhe punonjësve të ministrive.

Reforma synon që ta cojë pagën mesatare në shtet, 107 mijë lekë në muaj, sipas angazhimit që ndërmori qeveria një vit më parë kur deklaroi shifrën 900 euro.

Rreth 39 miliardë lekë është kosto e llogaritur për dy vendimet e vitit të kaluar dhe atij që do të firmoset këtë verë.

LEXONI GJITHASHTU:

• FMN: Rritja e pagave godet inflacionin, duhet të pajtohet me rritjen ekonomike
• Rritja e pagës mesatare me 20% në shtet dhe 14% në privat