Policia e Kosovës sekuestron arsenal armësh në Veri, arrestohet një person

Ministri i Brendshëm i Kosovës, Xhelal Sveçla, ka bërë të ditur se sot është zhvilluar një aksion në Uglarë të Zubin Potokut, ku edhe janë konfiskuar disa armë. Sveçla ka thënë se personi që i janë gjetur armët është arrestuar dhe lidhur me të ka nisur hetimet.

Përmes një postimi në faqen e vet në Facebook Sveçla thotë se s’do të ketë asnjë kompromis ndaj krimit, individëve apo grupacioneve që cenojnë sigurinë e vendit tonë dhe qytetarëve të Kosovës.

“Vijon suksesshëm angazhimi ynë në çrrënjosjen e krimit dhe largimin e mbetjeve kriminale të Serbisë në vendin tonë. Armë dhe mjete eksplozive si granatë dore, armë e gjatë, municion, radiolidhje, antiplumba e pajisje teknologjike janë zbuluar sot nga Policia e Kosovës gjatë bastisjes në një lokacion në fshatin Uglarë të Zubin Potokut. Personit të cilit i janë gjetur këto armë e pajisje është arrestuar dhe lënda është proceduar në Prokurori. Asnjë kompromis ndaj krimit, individëve apo grupacioneve që cenojnë sigurinë e vendit tonë dhe qytetarëve tanë.

Nuk do të ndalemi së punuari në mbrojtje të interesave tona shtetërore, siguri ndaj vendit e qytetarëve tanë, sundim të rendit dhe ligjit në çdo cep të Republikës sonë”, shkroi Sveçla në Facebook.

LEXONI GJITHASHTU:

• Jamie Shea: Ja si dhe kur do të anëtarësohet Kosova në NATO
• Kosova shënon 25-vjetorin e Çlirimit, FSK paradë me armatimet e reja