Rama nga Fieri: Në mandatin e tretë do të sjellim universitete të huaja në Shqipëri

Kryetari i Partisë Socialiste, Edi Rama ishte në Fier për të zhvilluar takime elektorale në këtë qytet. Gjatë një bashkëbisedimi me qytetarë, ai u tha se në mandatin e tretë do të punojë për të sjellë në Shqipëri universitete të huaja.

“Fëmijët tanë sot nuk janë të detyruar të marrim nga lloj-lloj librash apo sot fëmijët kur shkojnë në maturë e kanë të qartë se në universitet do të hyjnë aty ku e meritojnë, por ka end ponë që sistemi ynë arsimor të jetë në të gjithë pjesët e veta  të jetë i njëjtë e atë të vendeve evropiane.

Ne mbyllëm universitete fantazmë që prodhonin diploma false, por ende universiteti ynë nuk është në nivel që të mbajë këtu më të mirët dhe kjo është arsyeja pse duam mandatin e tretë, që të sjellim këtu universitete të huaja, të nxisim cilësinë duke rritur integrimin e tyre me universitete të huaja”, u shpreh kreu i qeverisë.

Vota për Partinë Demokratike sipas tij, është një votë që rikthen taksen për biznesin e vogël, që qeveria siç u shpreh ai, e ka zeruar.

Rama akuzoi sërish kryedemokratin Basha se po rrezikon jetën e qytetarëve me tubimet elektorale, dhe u shpreh se nëse opozita do të vijë në pushtet, procesi i vaksinimit do të ndalojë.