Gjykata lë në burg 5 autorët që dyshohen për vrasjen e Jan Prengës

Pesë të arrestuarit për rrëmbimin dhe zhdukjen e 49-vjecarit Jan Prenga do të mbeten në qeli. Ky është vendimi i Gjykatës së Tiranës për të akuzuarit për këtë krim të rëndë, që ndodhi më 17 janar në Kamëz.

Ata janë Leonard, Bajram dhe Elton Hajri si dhe Olsi Turja e Festim Bexhdili. Krahas 5 të arrestuarve, Prokuroria ka lëshuar edhe 6 urdhër arreste të tjera, ndërsa autoriteteve britanike iu është kërkuar të merret në pyetje vëllai i Jan Prengës, Astrit Prenga i cili ndodhet në burg në Angli.

Hetuesit duan që përmes dëshmisë së Astrit Prengës të zbulojnë se cilat janë  grupet kriminale që urdhëruan pengmarrjen dhe më pas vrasjen e Jan Prengës.

Nga ana tjetër, policia vijon kërkimet për të gjetur trupin e zhdukur të Prengës në disa zona përreth Shijakut. Të arrestuarit  kanë mohuar akuzat dhe nuk kanë bashkëpunuar me hetuesit.

Sipas policisë, rrëmbimi i 49-vjeçarit  ka ardhur si pasojë e përplasjes që një nga vëllezërit e viktimës ka pasur me organizatorët dhe rrëmbyesit.

Jan Prenga u mor peng me 17 janar në qytetin e Kamzës, por vetëm më 28 janar, policia konfirmoi vdekjen e tij nga humbja e gjakut nga dhuna e tortura që i është bërë. Policia vijon kërkimet intensive për gjetjen e trupit të pajetë të 49-vjeçarit.