Presidenti i Parlamentit Evropian David Sassoli do të vizitojë Tiranën

Zgjerimi i Bashkimit Evropian në Ballkanin Perëndimor do të jetë pika kyçe e agjendës së Presidentit të Parlamentit Evropian David Sassoli gjatë vizitës së tij në Shqipëri.

Pas vizitës së presidentit në Maqedoninë e Veriut në fillim të nëntorit, z. Sassoli lajmëroi se ai do të udhëtojë drejt Shqipërisë në datat 3 dhe 4 shkurt.

Përpara se të niset drejt Tiranës, Sassoli deklaroi se synon ta kthejë zhgënjimin në energji të re për të ecur përpara.

“Do të shkoj në Shqipëri për t’i inkurajuar dhe për t’i dhënë shpresë për të ecur përpara pas disa muajsh të vështirë për vendin. Së pari, dua të përsëris solidaritetin tim me Shqipërinë dhe popullin e saj pas tërmetit shkatërrimtar të nëntorit. Ngushëllimet e mia shkojnë për të gjithë ata që humbën personat e tyre të dashur. Ndërsa paraja nuk mund ta zhbëjë vuajtjen, është e nevojshme që të rindërtohen shtëpitë dhe infrastruktura. Kam besim tek bujaria e pjesëmarrësve në konferencën ndërkombëtare të donatorëve që organizohet nga BE-ja dhe do të mbahet në Bruksel më 17 shkurt”, thuhet në deklaratën e z. Sassoli.

“Së dyti, dua të rikonfirmoj mbështetjen e plotë të Parlamentit Evropian për hapjen e negociatave me Shqipërinë dhe Maqedoninë e Veriut. Të dyja vendet kanë bërë progres të madh, në një linjë me pritshmëritë tona. Nisja e negociatave mund të jetë një shtysë e madhe për reformat që janë duke u ndërmarrë për rrugëtimin drejt BE-së. Do të bëjmë ç’të jetë e mundur për të bindur vendet anëtare që kishin ende rezerva në mbledhjen e fundit të Këshillit”, shkruan ai më tej.

Gjatë vizitës së tij në Tiranë, Presidenti Sassoli do të mbajë një fjalim në Kuvendin e Shqipërisë. Ai do të takohet me Kryeministri Edi Rama, kryetarin e parlamentit Gramoz Ruçi, liderë të grupeve politike, Presidentin e Republikës Ilir Meta, kryetarin e bashkisë së Tiranës Erion Veliaj si dhe me kreun e Partisë Demokratike Lulzim Basha, dhe përfaqësuesen e Lëvizjes Socialiste për Integrim Klajda Gjosha. Sassoli do të takohet gjithashtu me studentë nga universitetet dhe përfaqësues të Shoqërisë Civile dhe UNICEF-in.

“Zhgënjimi për mos hapjen e negociatave nga Këshilli, duhet të përkthehet në energji të reja dhe iniciativa për të shikuar përpara. I jap kurajë Shqipërisë që të fokusohet mbi objektivin e përgjithshëm dhe ta përdorë këtë kohë për të adresuar ndonjë shqetësim që është ngritur, veçanërisht për sa i përket respektit të shtetit të së drejtës dhe luftës kundër krimit të organizuar dhe korrupsionit. Në fund të fundit, këto reforma janë për të mirën e vendit tuaj dhe brezave të ardhshëm. Edhe nëse rruga është me pengesa herë pas here, çdo hap na sjell më pranë të ardhmes së përbashkët europiane, e cila do ta pasurojë si Shqipërinë ashtu edhe Bashkimin Europian”, përfundoi Sassoli.