Bien shanset e Le Pen, Sondazhi: Ekstremi i djathtë nuk do ta sigurojë dot shumicën

Partitë e qendrës dhe ato të së majtës në Francë po përpiqen të gjejnë një mënyrë për të bllokuar avancimin e ekstremistëve në Parlament dhe një sondazh tregon se kjo është e mundur.

Sondazhi i kompanisë “Harris Interactive”, i pari që nga formimi i aleancës kundër Bashkimit Kombëtar, tregon se e djathta ekstreme e Marine Le Pen mund të mos i fitojë 289 vendet që nevojiten për të kontrolluar Asamblenë Kombëtare me 577 vende.

Sipas sondazhit, përpjekjet e qendrës së udhëhequr nga presidenti Emmanuel Macron dhe blloku i majtë Frontit i Ri Popullor për të bllokuar Bashkimin Kombëtar mund të rezultojë efikas.

Anketa tregon se ekstremistët e djathtë dhe aleatët e tyre kanë gjasa të marrin nga 190 deri në 220 vende. Ndërkohë, Republikanët e qendrës së djathtë, që kanë bërë aleancë me Le Pen, pritet të fitojnë 30 deri në 50 vende.

Rezultati ka gjasa që të parandalojë mundësinë të një qeverie ekstremiste pakicë, e mbështetur nga grupi i vogël parlamentar i republikanëve.

Sondazhi vjen pas tërheqjes së mbi 200 kandidatëve nga parti të ndryshme që dolën të tretat në raundin e parë të së dielës, me qëllim mbështetjen e kandidatit më të fortë kundër Bashkimit Kombëtar në raundin e dytë të së dielës.

Përpara tërheqjeve, sondazhat kishin sugjeruar se ekstremistët ishin pranë fitores së 250 deri në 300 mandateve.

E pyetur nga mediat franceze nëse ishte e shqetësuar që partia e saj mund të pësonte një rënie duke humbur shanset për mazhorancë absolute, Le Pen u përgjigj besimplotë duke thënë: “Jo, jam besimplotë. Francezët kanë një dëshirë reale për ndryshim”.

Sipas sondazhit, Fronti i Ri Popullor pritet të sigurojë nga 159 deri në 183 mandate, ndërsa fraksioni “Së Bashku” i Macron vetëm 110 deri në 135. Partitë e tjera parashikohet se do të fitojnë nga 17 deri në 31 mandate.

LEXONI GJITHASHTU:

• Zgjedhjet në Francë| Partia e ekstremit të djathtë të Le Pen fiton raundin e parë
• Francë, partitë e majta dhe qendrës thirrje për bashkim kundër të djathtës ekstreme