“Kontratat nuk kanë logjikë ekonomike”- Shehaj përplaset me Meten për koncensionet

Deputeti Agron Shehaj ka zhvilluar një interpelancë me ministrin e Financave, Ervin Mete në lidhje me kontratat koncesionare.

Deputeti Agron Shehaj ka zhvilluar një interpelancë plenare me ministrin e Financave në lidhje me kontratat koncesionare dhe sa paguhet nga buxheti i shtetit në lidhje me këto kontrata. Po ashtu Shehaj ka pyetur ministrin nëse ka pasur ndonjëherë ndërprerje të ndonjë kontratë koncesionare për performancë të ulët në zbatimin e kontratës.

“Pavarësisht miliarda eurove të PPP ka një mungesë totale informacioni mbi respektimin e kontratave koncesionare. Ne dimë sa para jep shteti koncesionarëve, por nuk kemi asnjë informacion mbi ecurinë e investimeve që privatet duhet të kishin bërë. Nuk dimë nëse këto investime janë bërë brenda afateve. Ne nuk dimë nëse koncesionari ka plotësuar kushtet e kontratës. Këto kontrata janë hartuar në interes të koncesionarëve dhe jo qytetarëve. Vetë kontratat nuk kanë logjikë ekonomike të përbashkët”, tha Shehaj.

Ministri i Financave Ervin Mete  deklaroi se dy koncesione ku Ministria e Financave është autoritet kontraktor po shkojnë drejt mbylljes.

“Në gusht të këtij viti, pra muajin tjetër, përfundon koncesioni i markimit të karburanteve dhe shërbimi kalon tek Drejtoria e Përgjithshme e Doganave. Në momentin që ky koncesion do të përfundojë, ne kemi vendosur që edhe tarifa e aplikuar nga koncesionari të hiqet. Pra, nuk do të ketë vazhdim të aplikimit të tarifës së markimit tek qytetarët dhe bizneset. Kostot e vazhdimit të shërbimit do të përballohen nga buxheti i shtetit”, tha Mete.

Gjithashtu, Mete nënvizoi se koncesioni i pullave fiskale, përfundon më 1 janar 2025.

Shmangies së përgjigjeve të  ministrit Metës mbi PPP-të, Shehaj iu përgjigj nga vendi se do të shkojë në SPAK.