Kryeparlamentarja Spiropali pret në takim homologun e saj në Kosovë, Glauk Konjufca

Kryetarja e Kuvendit, znj. Elisa Spiropali, zhvilloi sot një takim miqësor me Kryetarin e Kuvendit të Kosovës, z. Glauk Konjufca, në Kryesinë e Kuvendit.

“Jam e lumtur që vizitën e parë miqësore në zyrë pas marrjes së detyrës së Kryetares së Kuvendit, e pata nga Kryetari i Kuvendit të Kosovës, z. Glauk Konjufca. Kuvendi i Shqipërisë dhe Kuvendi i Kosovës kanë ndërtuar një bashkëpunim vëllazëror të shkëlqyer, jo thjesht protokollar, por funksional dhe praktik, mes kryetarëve, komisioneve parlamentare, grupeve parlamentare dhe deputetëve.”-u shpreh znj. Spiropali.

Më tej Kryetarja e Kuvendit të Shqipërisë theksoi se Memorandumi i Bashkëpunimit, nënshkruar në shtator 2022, krijoi një kuadër të përbashkët për bashkëpunimin parlamentar, i cili u pasua nga mbledhja e përbashkët e dy Kuvendeve, me rastin e 110-vjetorit të pavarësisë, më 27 nëntor 2022.

“Të dy Kuvendet tona do të vijojnë të bashkëpunojnë për proceset integruese në BE, mbështetjen e pranimit të Kosovës në NATO, Këshillin e Europës dhe përfaqësimin në organizatat ndërkombëtare. Delegacionet e Kuvendit të Shqipërisë në organizatat parlamentare ndërkombëtare po lobojnë fort për rritjen e përfaqësimit, njohjeve dhe rolit ndërkombëtar të Kosovës. Vizitën e parë si Kryetare e Kuvendit të Shqipërisë padyshim do ta mbaj në Kosovë.”-u shpreh znj. Spiropali.

LEXONI GJITHASHTU:

• Me 75 vota pro, Elisa Spiropali zgjidhet kryetare e Kuvendit të Shqipërisë
• Deputetët e PS firmosin propozimin për Elisa Spiropalin si kryetare e Kuvendit