Silva Caka: Në këtë fushatë nuk ka nevojë për frymë, qytetarët janë të lodhur nga qeverisja e Ramës

Silva Caka, kandidate për deputete e LSI-së foli në studion e Euronews Albania në lidhje me ecurinë e fushatës për zgjedhjet e 25 prillit.

Znj. Caka tha se fushata gjatë pandemisë nuk lejon që të krijohet një frymë për shkak të mungesës së grumbullimit të njerëzve, mirëpo për të një gjë e tillë nuk është e nevojshme meqenëse qytetarët, të lodhur nga 8 vite qeverisje nga PS, nuk kanë nevojë për frymë për të mos e votuar atë.

“Masiviteti është diferenca midis fushatës që zhvillohet gjatë pandemisë dhe asaj në kushte normale. Masiviteti përdoret për të krijuar frymën, mirëpo këtë herë nuk do të shërbente. Është një pakënaqësi shumë e madhe dhe nuk ka nevojë për të krijuar një frymë nëpërmjet mitingjeve”, u shpreh kandidatja për deputete e LSI-së.

Në lidhje me fletën e votimit, znj. Caka tha se e konsideron si një ndër veprimet e shumta të Ramës për të treguar se ky i fundit i trajton njerëzit si dele, si nëse bëhet fjalë për qytetarët që e votuan, si për personat që ka në partinë e tij.

“Më duket si një fletë matrikullimi delesh, pasi me të gjitha ligjet dhe veprimet që ka ndërmarrë, me mënyrën se si i trajton personat që e sollën në pushtet gjatë tetë viteve qeverisje është pikërisht si një tufë me dele. E njëjta gjë ka ndodhur edhe me listat e zgjedhjeve”, tha znj. Caka.

Sipas Silva Cakës, ajo çfarë Rama ka për synim të arrijë me këtë format flete votimi është që të mos votohen socialistët e vjetër të PS-së.

“Ata që penalizohen janë socialistët e paktë që kanë ngelur në listën e Rilindjes së Edi Ramës. Këta socialistë kanë qenë frika e Edi Ramës. Për t’i sfumuar, përveçse i degdis në fundin e listës, ju heq edhe emrat”, tha kandidatja e LSI-së, ndërsa theksoi se për LSI-në nuk përben problem çështja e kandidatëve, pas e rëndësishme është vota e subjektit politik.