Urdhër-arrest për Gonzales, lideri i opozitës akuzohet për “krime të rënda”

Një gjyqtar në Venezuelë ka lëshuar një urdhër-arrest për kandidatin e opozitës në zgjedhjet e fundit presidenciale, Edmundo Gonzales.

Lëvizja vjen pas një kërkese të zyrës së prokurorit, që është besnike ndaj presidentit Nicolas Maduro.

Ky i fundit u shpall fitues i zgjedhjeve të korrikut nga këshilli elektoral i vendit, që është i mbushur me besnikë të qeverisë.

Por ekzekutivit i duhet ende të publikojë prova në mbështetje të fitores së pretenduar, në një kohë kur opozita thotë se lideri i saj fitoi lehtësisht.

“Askush në këtë vend nuk është mbi ligjin dhe mbi institucionet”, deklaroi presidenti Maduro, në fjalimin e përjavshëm televiziv.

Ky hap përbën një përshkallëzim domethënës të tensioneve politike në vendin amerikano-jugor.

Zoti Gonzales ishte kandidati që garoi ndaj Maduros në zgjedhjet e fundit presidenciale dhe që prej ditës së votimit aleanca e tij opozitare ka publikuar online një seri të dhënash që tregojnë se ai e fitoi procesin me një avantazh prej më shumë se 30 votash.

Dyshohet që pikërisht këto të dhëna ta kenë shtyrë administratën e presidentit Maduro të lëshonte urdhër-arrestin, duke e akuzuar Gonzales për krime të rënda si uzurpim të posteve shtetërore, falsifikim të dokumenteve, nxitje të mosbindjes civile dhe sabotim të sistemit.

Nga ana e tij, zoti Gonzales, që jeton i fshehur prej disa ditësh, ka mohuar çdo shkelje.

LEXONI GJITHASHTU:

• SHBA sekuestron avionin e presidentit të Venezuelës
• Gjykata e Lartë e Venezuelës konfirmon fitoren e Maduros në zgjedhjet presidenciale