‘Surprizon’ Putin: Dua që zgjedhjet në SHBA t’i fitojë Kamala Harris!

Presidenti Vladimir Putin tha se Rusia dëshiron që Kamala Harris të fitojë zgjedhjet presidenciale në SHBA.

Sipas mediave të huaja, deklaratat Putin i bëri të enjten në një koment në dukje ironik, duke përmendur të qeshurën e saj “infektive” si një arsye për ta preferuar atë mbi Donald Trump.

Putin po fliste një ditë pasi Departamenti Amerikan i Drejtësisë akuzoi dy drejtues të mediave ruse për një skemë të dyshuar të paligjshme për të ndikuar në zgjedhjet e nëntorit me propagandë pro-ruse.

Udhëheqësi i Kremlinit kishte thënë në fillim të këtij viti, përpara se presidenti Joe Biden të tërhiqej nga gara, gjithashtu me ironi të dukshme, se ai e preferonte atë mbi Trump, sepse Biden ishte një politikan më i parashikueshëm i “shkollës së vjetër”.

I pyetur se si i shikon ai zgjedhjet tani, Putin tha në një forum ekonomik në lindjen e largët të Rusisë se ishte zgjedhja e popullit amerikan.

Por më pas ai shtoi se ashtu siç Biden u kishte rekomanduar mbështetësve të tij të mbështesin Harrisin, “ne do të bëjmë të njëjtën gjë, ne do ta mbështesim atë”.

“Ajo qesh në mënyrë ekspresive dhe infektive sa do të thotë se gjithçka është në rregull me të”, tha Putin, duke shtuar se ndoshta kjo do të thoshte se ajo do të përmbahej nga sanksionet e mëtejshme kundër Rusisë.

Agjencitë e inteligjencës amerikane besojnë se Rusia dëshiron që Trump të fitojë sepse ai është më pak i përkushtuar për të mbështetur Ukrainën në luftën kundër Rusisë.

Por Putin tha se Trump, si president, kishte vendosur më shumë sanksione kundër Rusisë se kushdo në Shtëpinë e Bardhë para tij.

LEXONI GJITHASHTU:

• Mongolia nuk mundi të arrestojë Putin, zëdhënësi: Mbijetesa jonë varet nga Rusia
• BE-ja shpreh keqardhje që Mongolia s’e arrestoi Putinin