Monitorimi i fushatës për 25 prillin, ODIHR publikon raportin e ndërmjetëm 10 ditë para zgjedhjeve

Misioni i përkohshëm i vëzhguesve të ODIHR ka publikuar raportin e ndërmjetëm për zgjedhjet e 25 prillit. Në këtë raport të dytë për zgjedhjet e 25 prillit, ODIHR thekson se KQZ ka rregulluar aspekte të ndryshme të procesit zgjedhor, implementimi i të cilave tashmë është në proces e sipër.

Duke bërë një panoramë të ngjarjeve politike gjatë këtyre javëve që ka nisur fushata zyrtarisht, raporti i ODIHR vë theksin te afati i shkurtër që ka pasur KQZ për të përballuar një volum të madhe aktesh nënligjore dhe rregulluese.

Sa i përket shqetësimit për kohën e kufizuar të përgatitjes para ditës së zgjedhjeve, ODIHR thotë se pritet të nisë një program mbarëkombëtar i edukimit të zgjedhësve për adresimin e mundësisë së re të votimit preferencial, si dhe për sistemin e sapo futur në përdorim për regjistrimin elektronik të zgjedhësve.

Ndërsa për sistemin elektronik të identifikimit të zgjedhësve ODIHR thotë se shumica e vëzhguesve kanë shprehur vlerësime për këtë sistem, të cilin ata e perceptojnë si një masë për minimizimin e rrezikut të votimit të dyfishtë apo të falsifikimit të identitetit të zgjedhësit.

Sakaq, me shqetësim në këtë raport të ndërmjetëm të ODIHR evidentohet injorimi i rekomandimit të mëhershëm për depolitizimin e administratës zgjedhore.

Lexoni gjithashtu:

Monitorimi i zgjedhjeve të 25 prillit, ODIHR: Shqetësim për ndryshimet në kod, ishin të shpejta

Përgatitjet për 25 prillin, Rama takohet me shefen e misionit të ODIHR, Urszula Gaçek