I dënuar nga Gjykata e Elbasanit, ekstradohet nga Vjena 26-vjeçari

Policia e Shtetit ka ekstraduar nga Vjena një shtetas shqiptar 26-vjeçar, të dënuar me 3 vjet e 4 muaj burgim nga Gjykata e Elbasanit.

I riu ndodhej në kërkim ndërkombëtar pas dënimit për veprën penale “Ndihma për kalim të paligjshëm të kufijve”, kryer në bashkëpunim me individë të tjerë.

Në vitin 2021,26-vjeçari ishte kapur në aksin rrugor “Librazhd-Elbasan”, ku transportonte, së bashku me katër të tjerë, 10 emigrantë sirianë që kishin hyrë ilegalisht në Shqipëri me destinacion vendet e Bashkimit Evropian.

Pas ekstradimit, ai do t’i dorëzohet Drejtorisë së Përgjithshme të Burgjeve për të vuajtur pjesën e mbetur të dënimit, rreth 2 vjet.

“Si rezultat i koordinimit të veprimeve operacionale, ndërmjet Interpol Tiranës dhe homologëve në Austri, u finalizua procedura për ekstradimin në Shqipëri, të shtetasit N. A, 26 vjeç, i lindur në Bulqizë. Ai ishte i kërkuar ndërkombëtarisht, pasi Gjykata e Elbasanit, në vitin 2022, e ka dënuar me 3 vjet e 4 muaj burgim, sepse në vitin 2021, u konstatua në aksin rrugor “Librazhd-Elbasan”, në vendin e quajtur “Ura e Lizës”, duke transportuar me furgon, në bashkëpunim me 4 shtetas të tjerë, 10 emigrantë nga Siria që kishin hyrë ilegalisht në Shqipëri dhe kishin destinacion shtetet e BE-së. Shtetasi N. A, do t’i dorëzohet Drejtorisë së Përgjithshme të Burgjeve, për të vuajtur pjesën e mbetur të dënimit me burgim, rreth 2 vjet,” thuhet në njoftimin e policisë.

LEXONI GJITHASHTU:

• Emri| Në kërkim për grabitje me armë, ekstradohet drejt Italisë 46-vjeçari
• Në kërkim ndërkombëtar nga SPAK, ekstradohet nga Kolumbia 25-vjeçari shqiptar