E diela rekord golash në Serinë A, 8 realizime në Inter-Juventus

Si rrallë herë më parë, kampionati Italian mori vëmendjen e gjithë Evropës të dielën, e cila rezervoi një lumë golash. Pesë duele, të cilat në total regjistruan 23 gola, me qershinë mbi tortë padyshim derbin e Italisë mes Interit dhe Juventusit, i mbyllur në një barazim 4-4. Në Meazza u zhvillua një ndër duelet më dramatike të viteve të fundit, aty ku 8 gola vlejtën vetëm për 1 pikë. Zikaltrit ishin ata që e nisën më mirë sfidën duke gjetur avantazhin me Zielinskin, por bardhezinjtë e përmbysën me dyshen Vlahovic-Weah.

Mkitaryan dhe Zielinski shënuan sërish, duke e mbyllur fraksionin e parë me rezultatin 3-2. Në të dytin ritmi ishte po njësoj; Dumfries dërgoi shifrat në 4-2, ndërsa dopieta e Yildiz i dha një pikë ekipit të Mottës.

Gjithashtu, 6 gola regjistroi përballja tjetër mes Fiorentinës dhe Romës, me ekipin vjollcë që shënoi 5 herë në portën e kryeqytetasve. Lazio mposhti Genoan 3-0, ndërsa dy përballjet Monza-Venezia dhe Parma-Empoli u mbyllën pa fitues, me rezultatet respektive 2-2 dhe 1-1.