Saimir Tahiri paraqitet në Prokurorinë e Posaçme, zbardhet arsyeja

Ish-ministri i Brendshëm i Shqipërisë, Saimir Tahiri, është paraqitur këtë të premte në Prokurinë e Posaçme.

Burime bëjnë me dije se Tahiri është thirrur në organin e akuzës për të dëshmuar në lidhje me ngjarjet e 21 janarit 2011, kur gjatë një proteste të zhvilluar nga opozita e atëhershme u vranë katër protestues.

Tahiri pritet të pyetet si një person që ka dijeni për ngjarjen, pasi ishte një eksponent i rëndësishëm në radhët e Partisë Socialiste asokohe dhe një prej organizatorëve të protestës.

Prokuroria e Posaçme kundër Korrupsionit dhe Krimit të Organizuar rihapi hetimet mbi ngjarjet e 21 janarit 2011, pas vendimit të gjykatës së Strasburgut dhe më pas të Gjykatës së Lartë e cila ia kaloi për kompetencë SPAK-ut.

Gjatë protestës të organizuar nga opozita e atëhershme socialiste përpara Kryeministrisë, u vranë 4 qytetarë – Ziver Veizi, Hekuran Deda, Aleks Nika dhe Faik Myrtaj – të cilët u qëlluan nga forcat e gardës.

Në lidhje me hetimet janë pyetur familjarët e viktimave, si dhe drejtuesit e lartë të Policisë së Shtetit të asokohe, ndërkohë që hetimet e SPAK vijojnë.

LEXONI GJITHASHTU:

• Ish-drejtori i Përgjithshëm i Policisë së Shtetit pyetet në SPAK për 21 Janarin
• “21 janari”| E veja e Aleks Nikës flet pas daljes nga SPAK: Dhashë disa fakte