Çmontohet rrjeti i falsifikuesve, operacion në 4 vende, sekuestrohen 2100 vepra arti

Autoritetet italiane njoftuan të martën çmontimin e një rrjeti kriminelësh evropianë që falsifikonin dhe shisnin vepra arti.

Seksionet e posaçme në policinë dhe karabinierinë italiane bënë të ditur se të dyshuarit si anëtarë të rrjetit falsifikonin veprat e artistëve të mëdhenj si Warhol, Bansky dhe Picasso, të cilat më pas ua shisnin blerësve anonimë me ndihmën e shtëpive italiane të ankandit.

Sipas burimeve zyrtare, në tërësi rreth 2.100 vepra të falsifikuara u sekuestruan në Itali, Francë, Spanjë dhe Belgjikë.

Nga llogaritjet paraprake rezultoi se grupi mund të kishte shkaktuar 200 milionë euro dëme ekonomike duke e mbushur tregun e artit me imitime.

Operacioni zbuloi edhe një rrjet falsifikuesish në Spanjë, Francë dhe Belgjikë, të cilët i prodhonin veprat – deklaroi agjencia evropiane për bashkëpunimin juridik, Eurojust.

Hetimet mbi çështjen nisën në vitin 2023, kur autoritetet italiane zbuluan 200 imitime gjatë kontrollit të shtëpisë së një biznesmeni në Piza, zbulim që i shtyu ata të monitoronin web site-t e shit-blerjeve të shtëpive të ankandit, për të parë nëse kishte palë të tjera të përfshira.

Të 38 personat që ndodhen nën hetim akuzohen për komplot me qëllim falsifikimin dhe shitjen e veprave të artit.

LEXONI GJITHASHTU:

• Eurojust dhe SPAK godasin rrjetin shqiptar të kokainës në Europë, 83 urdhër-arreste
• I mori përmes mashtrimit 42 mijë euro një gruaje, arrestohet 27-vjeçari