Neymar drejt rikthimit në Brazil, futbollisti akord me klubin ku nisi karrierën

Më herët e kishte konfirmuar se do ta mbyllte karrierën te Santos, aty ku nisi gjithçka, dhe duket se Neymar e ka marrë vendimin më herët nga sa pritej. 32-vjeçari u ka bërë të ditur drejtuesve të Al Hilal se do të largohet në 2025-ën dhe destinacioni i ri është vendlindja, Brazili. Aty ku nisi karrierën e cila fatkeqësisht u karakterizua nga dëmtimet, por periudha te Santos ishte ndër më të ndriturat për të.

Sipas asaj që mediat braziliane raportojnë, Neymar ka arritur një akord paraprak me Santos, ku ka diskutuar me presidentin e skuadrës. Lojtari në fjalë ka pranuar kushtet dhe pret përfundimin e kontratës në Arabinë Saudite.

Pak javë më parë Neymar u kthye nga dëmtimi, por pësoi një tjetër lëndim në fushë, teksa aktivizohej me Al Hilal. Problemet e shpeshta shëndetësore të tij bënë që në 1 vit me ekipin saudit të luajë vetëm 3 ndeshje. I afruar me shumë bujë, si një ndër lojtarët më me kualitet në kontinentin e vjetër, por fati nuk qe me të. Në një situatë të tillë, i vetmi vend që mund t’ia rikthejë këtë faktor është vendlindja.

LEXONI GJITHASHTU:

• U dëmtua rëndë në gju, Neymar rikthehet në stërvitje pas një viti mungesë
• Neymar plan për blerjen e skuadrës ku nisi karrierën