Moti i keq, rënie gurësh në rrugë dhe ndërprerje energjie në Elbasan

Për shkak të kushteve të motit të keq që ka përfshirë vendin, me një erë të fortë dhe shi të pandërprerë, në aksin Librazhd-Elbasan, në afërsi të urës së Murrashit ka pasur rënie gurësh në rrugë dhe rënie të pemëve në aksin ku po punohet për autostradën duke krijuar vështirësi në qarkullim.

Prej disa orësh është duke u punuar intensivisht te “Kthesat e Murrashit” në aksin Librazhd-Elbasan, për të hapur rrugën dhe pastruar masivet e dherave e gurëve që bien pa ndërprerje nga shpati i kodrës.

Puna ka nisur për të mundësuar kalimin e sigurt të automjeteve dhe për të parandaluar çdo incident që mund të shkaktohet nga lëshimi i masivëve të dheut dhe gurëve. Ndërkohë shërbimet e policisë rrugore janë vendosur në të gjitha segmentet problematike dhe përdoruesit e rrugës Tiranë-Korçë këshillohen të evitojnë qarkullimin gjatë natës të së premtes pasi rreziku nga kushtet atmosferike është i madh.

Gazetarja e Euronews Albania raporton se në Qarkun e Elbasanit ka probleme dhe me furnizimin me energji elektrike pasi sipas saj rreth 324 familje janë pa drita. OSHEE po punon për riparimin e dëmeve të shkaktuara nga era e fortë në linjat elektrike.

LEXONI GJITHASHTU:

• Moti i keq në vend, policia apel shoferëve: Respektoni rregullat e qarkullimit
• Aksident me 3 të plagosur në aksin rrugor Korçë-Kapshticë