Vrasja në Elbasan, ambasadorja amerikane u kërkon krerëve të politikës vetëpërmbajtje

Ambasada amerikane ka reaguar lidhur me ngjarjen e rëndë të ndodhur në Elbasan ku një person u vra me armë zjarri dhe 4 të tjerë mbetën të plagosur pas një konflikti që mendohet se ndodhi për çështje politike.

Përmes një postimi në faqen zyrtare në Facebook, ambasada e SHBA bën thirrje për hetim të plotë të ngjarjes, ndërsa kërkon nga krerët e shtetit dhe politikës shqiptare të tregojnë vetëpërmbajtje në mënyrë që të mos dalin në konkluzione para se hetimet lidhur me ngjarjen të mbyllen.

“Kemi ndjekur raportimet për dhunën në Elbasan sot, e cila përfundoi në vdekjen e një personi dhe plagosjen e të tjerëve. Ne u bëjmë thirrje zyrtarëve të zbatimit të ligjit të hetojnë këtë incident sa më shpejt dhe në mënyrë të plotë, të identifikojnë autorët dhe t’i dënojnë me të gjithë forcën e ligjit. Ata që përfshihen në dhunë të tillë duhet të ndëshkohen.

Ambasadorja Kim i ka kërkuar Presidentit Meta, Kryeministrit Rama dhe Kryetarit të Partisë Demokratike Basha të ushtrojnë vetëpërmbajtje – dhe të udhëheqin në të njëjtën mënyrë – ndërsa çështja është duke u hetuar. Veprimet tona duhet të bazohen në fakte, jo në frikë apo thashetheme. Kur vetëm disa ditë na ndajnë nga zgjedhjet e 25 prillit, ne përsërisim deklaratën tonë të 26 marsit duke bërë thirrje që udhëheqësit – ata që janë në pushtet dhe ata që kërkojnë pushtet – të refuzojnë qartazi dhunën. Ambasada Amerikane do të vazhdojë të monitorojë situatën nga afër”, thuhet në reagimin e ambasadës.