Kurti për sulmin terrorist në Ibër-Lepenc: Gjetëm emblema të ushtrisë ruse dhe Serbe

Kryeministri i Kosovës Albin Kurti,shkruan në një postim në Facebook se pas bastisjeve në veri të vendit, në lidhje me sulmin kinetik terrorist të 29 nëntorit në kanalin e Ibër-Lepencit, janë konfiskuar armë, uniforma dhe pajisje të ndryshme.

Kurti tha se janë gjetur emblema ruse dhe serbe të strukturave të inteligjencës, ushtrisë dhe sigurisë së Serbisë dhe Rusisë.

“Pas bastisjeve në veri të Kosovës, në lidhje me sulmin kinetik terrorist të datës 29 nëntor 2024 ndaj kanalit të Ibër Lepencit, janë konfiskuar armë, uniforma dhe pajisje të ndryshme, si dhe janë gjetur emblema ruse dhe serbe të strukturave të inteligjencës, ushtrisë dhe sigurisë.

Ky zbulim shqetësues dëshmon për përfshirjen potenciale të grupeve ekstremiste dhe terroriste serbo-ruse, me lidhje të forta në Serbi, që kanë për qëllim destabilizimin e Kosovës dhe krijimin e një mjedisi të pasigurt në rajon.

Stabiliteti dhe paqja në Ballkan kërkojnë një reagim të unifikuar dhe vendimtar kundër këtyre aksioneve terroriste dhe aktiviteteve destabilizuese që rrezikojnë sigurinë e përgjithshme dhe vlerat demokratike në rajon”.

LEXONI GJITHASHTU:

• Ministrja në Kosovë njofton ‘zgjidhjen e re inxhinierike’ në Ibër Lepenc
• Sulmi në kanalin e Ibër-Lepencit, kufizime të furnizimit me ujë në 3 komuna në Veri