Sirianët e Moskës në festë, ngrenë flamurin e opozitës në selinë e ambasadës siriane

Sirianët në Moskë u mblodhën të hënën në selinë e ambasadës siriane për të festuar rrëzimin e Bashar al Assad dhe për të ngritur flamurin e opozitës në ndërtesë.

Grumbullimi erdhi pasi Kremlini deklaroi se Rusia i kishte dhënë azil politik ish-presidentit. Zëdhënësi Dmitry Peskov u tha gazetarëve se vendimi ishte marrë personalisht nga presidenti Vladimir Putin.

Ai shtoi se Moska po bën gjithçka për të garantuar sigurinë e bazave të saj ushtarake në Siri dhe do të zhvillojë bisedime me autoritetet e reja të vendit.

Ndërkohë, ministri i Jashtëm izraelit tha se forcat e tij kishin goditur depozita në Siri ku mbaheshin armë kimike dhe raketa me rreze të gjatë veprimi.

“I vetmi interes që ne kemi është siguria e Izraelit dhe qytetarëve të tij. Prandaj i sulmuam këto sisteme armatimesh strategjike si për shembull armët kimike, apo raketat me rreze të gjatë veprimi, në mënyrë që të mos bien në duart e ekstremistëve”, tha Gideon Saar, ministër i Jashtëm i Izraelit.

Sulmet u kryen pasi trupat izraelite morën nën kontroll një zonë sigurie në Lartësitë Golan të Sirisë, duke shkelur akordin e pazbatuar të vitit 1974. Ministri i Jashtëm garantoi se lëvizja ishte e përkohshme dhe për motive sigurie.

LEXONI GJITHASHTU:

• Publikohet foto e parë e presidentit të rrëzuar sirian Bashar al-Assad në Rusi
• Turqi-Siri pa Assad/ Mediu: Çfarë politike pritet të ndjek tani SHBA