“Çdo person i dyshimtë do e pësojë si ai i Elbasanit”, Mziu shfaq shenja pendese për deklaratën para demokratëve

Kryesuesi i listës së Partisë Demokratike në Dibër, Xhelal Mziu gjatë një takimi elektoral ka deklaruar se qytetarët duhet të raportojnë te Strukturat e Mbrojtjes së Votës për çdo person të dyshimtë që lëviz në lagjet e tyre.

Mziu theksoi se këta persona (të dyshimtë) do ta pësojnë si rasti i Elbasanit, duke iu referuar kështu ngjarjes që ndodhi pak ditë më parë në lagjen “5 maji” ku humbi jetën Pjerin Xhuvani dhe u plagosën 4 persona të tjerë.

“Kemi ngritur grupet e gatshme, nga sot edhe në vazhdim çdo person i dyshimtë që lëviz në lagjet tuaja, mjafton një telefonatë dhe do ta pësojë njëlloj si ai i Elbasanit”, u shpreh kandidati i PD-së gjatë një takimi elektoral në Dibër.

Por, menjëherë Mziu ka shfaqur pendesë për këtë deklaratë të bërë para demokratëve, ku sipas tij gjithçka ndodhi nga emocionet e forta të momentit.

“Me sinqeritetin më të madh, shpreh keqardhjen time dhe pendesën time për komentin tim të panevojshem dje, për shkak të emocioneve të forta të momentit.  Dua të jem i qartë: unë mbështes zgjedhje të lira dhe të ndershme dhe jam kundërdhunës”, shprehet Mziu.

“Jam penduar thellë për komentin tim dhe kërkoj ndjesë para gjithë shqiptarëve”, përfundon ai.

Lexoni gjithashtu:

Gazment Bardhi shpjegon rrethanat e vrasjes në Elbasan: Autori nuk është shoqërues i imi

Policia arreston 11 persona për përplasjen me armë në Elbasan