Meta: Nuk impresionohem nga lobistët që flasin anglisht dhe mendojnë serbisht për Shqipërinë

Presidenti Ilir Meta, gjatë një konference për mediat ditën e sotme, u pyet nga gazetari i Euronews Albania, Ardit Hoxha lidhur me deklaratën e bërë dje se ambasadorja e SHBA po tregohet e njëanshme duke mbajtur krahun e kryeministrit.

Kreu i shtetit tha se nuk impresionohet nga lobistët që flasin anglisht dhe mendojnë serbisht për Shqipërinë teksa theksoi se Shqipëria do të jetë e shqiptarëve.

“Siç e dini presidenti i Serbisë ndërhyri në punët e brendshme të Shqipërisë, doli me parullën që Luli është kukull e doktorit. Është një skenar për të përmbysur vullnetin e shqiptarëve për të ardhmen në Evropë. Kam respekt të palëkundur për SHBA-të pasi na kanë frymëzuar për lirie dhe demokraci dhe janë angazhuar për futjen e Shqipërisë në BE sa më shpejt. Ka qenë ky përkushtimi i jetës sime si student i Dhjetorit dhe kjo gjë do të ndodhë se s’bën.

Shqipëria nuk do të bëhet gazi i botës nesër. Nuk impresionohet presidenti nga lobistët që flasin anglisht dhe mendojnë serbisht për Shqipërinë.  Shqipëria do të jetë e shqiptarëve”, tha kreu i shtetit.

Ambasadorja e Shteteve të Bashkuara në Tiranë, Yuri Kim, apeloi mbrëmjen e së premtes që të ndalohen thirrjet për dhunë gjatë zgjedhjeve të 25 prillit. Apeli i saj ishte pasi Presidenti Ilir Meta u bëri thirrje dy ditë më parë banorëve të qarkut Fier që “të mprehin sëpatat dhe sfurqet” dhe “të ngrihen në mbrojtje të votës”.

Presidenti Meta ishte i ftuar mbrëmjen e së premtes në një emision televiziv ku replikoi me mesazhin e Ambasadores duke theksuar se ajo “ka ndërhyrë boll herë në punët e brendshme të Shqipërisë” dhe se ajo nuk duhet “të marrë më në mbrojtje Edi Ramën”.