10 të vdekur dhe 35 të plagosur/ Çfarë dimë për sulmin në New Orleans

Dhjetë persona humbën jetën dhe të paktën 35 të tjerë u plagosën pasi një burrë u përplas me makinë në një turmë të madhe në New Orleans në orët e para të ditës së Vitit të Ri, thanë autoritetet.

Ja çfarë dimë deri tani.

Kur ka ndodhur ngjarja?

Në orën 03:15 të ditës së Vitit të Ri, një burrë futi një kamionçinë me shpejtësi në një turmë të madhe në Rrugën Bourbon.

Policia e përshkroi aktin si “shumë të qëllimshëm”, duke shtuar se burri ishte “i vendosur të krijonte masakrën dhe dëmin që bëri”.

“Ky njeri po përpiqej të shtypte sa më shumë njerëz që të mundej”, tha shefi i policisë së New Orleans, Anne Kirkpatrick.

Shoferi ka qëlluar me armë zjarri nga automjeti i tij, duke plagosur dy efektivë. Ata janë në gjendje të qëndrueshme, thanë autoritetet.

Në një përditësim të mëvonshëm, FBI konfirmoi se shoferi kishte vdekur dhe se incidenti po hetohej si një “akt terrorizmi”.

Kush u plagos?

Policia tha se 10 persona u vranë dhe të paktën 35 u plagosën. Asnjëri prej tyre ende nuk është identifikuar.

Të plagosurit janë dërguar për ndihmë mjekësore në disa spitale të zonës.

Policia tha se viktimat ishin kryesisht vendas.

Ku ndodhi?

Burri u përplas me makinën në një turmë të madhe në rrugën Bourbon në qytetin jugor amerikan të New Orleans në Luiziana.

Bourbon Street është një rrugë e njohur e jetës së natës dhe pikë e nxehtë turistike që është e mbushur me bare, klube me muzikë live dhe restorante.

Është brenda lagjes franceze të Neë Orleans, një zonë e gjallë që tërheq turistët dhe vendasit, veçanërisht për të festuar vitin e ri.

Po shoferi?

Drejtuesi i mjetit ka ndërruar jetë, por ende nuk dihen shkaqet e vdekjes.

Ai nuk është identifikuar nga policia, e cila tha më herët se kishte qëlluar në drejtim të oficerëve kur ata u përgjigjën në vendngjarje.

Kamioni, një Ford F-150 Lightning i bardhë, me një mbulesë të dëmtuar rëndë u vendos përballë kabaresë së Rick në Bourbon Street, pranë kryqëzimit të rrugës Conti.

Zyrtarët po hetojnë nëse i dyshuari ishte i lidhur ose i frymëzuar nga një organizatë e huaj terroriste, sipas partnerit amerikan të lajmeve të BBC-së, CBS.

Hetuesit gjithashtu po analizojnë pajisje të mundshme shpërthyese të gjetura në ose afër vendit të ngjarjes.

Një armë e gjatë u gjet në vendin e ngjarjes, raportoi CBS.

Çfarë u gjet në vendngjarje?

Agjentja speciale Althea Duncan e Byrosë Federale të Hetimit (FBI) konfirmoi në një konferencë shtypi në mëngjes se agjencia kishte marrë përsipër hetimin.

Zonja Duncan tha se një pajisje e mundshme shpërthyese ishte gjetur në vendngjarje dhe autoritetet po punonin për të zbuluar nëse ishte “e zbatueshme”.

Ajo theksoi se publiku duhet të qëndrojë larg zonës “derisa të kuptojmë se çfarë po ndodh”.

Policia kërkoi që publiku të qëndrojë larg rrugës Bourbon midis rrugëve Canal dhe St Ann.

Çfarë thanë dëshmitarët?

Një dëshmitar i cili ishte në rrugën Bourbon në kohën e incidentit ka ndarë disa nga skenat e tmerrshme.

Whit Davis, nga Shreveport, Luiziana, tha për BBC: “Ne kishim qenë në dhe rreth Bourbon Street që nga fillimi i mbrëmjes. Kur ishim në bar, nuk dëgjuam të shtëna apo përplasje sepse muzika ishte shumë e lartë”, tha zoti Davis.

Policia mbajti zotin Davis dhe një grup njerëzish në lokal dhe kur u lejuan të largoheshin, ai tha se ata “po kalonin pranë trupave të vdekur dhe të plagosur në të gjithë rrugën”.