Tanke, dronë dhe ushtarë luftojnë për fshatin rus në ofensivën e Kurskut

Një dron i afrohet një kolone tankesh që po çajnë përpara përgjatë fushës së mbuluar me borë, tregojnë pamjet e publikuara nga Garda Kombëtare e Rusisë.

Ky sulm ndodhi në jugperëndim të fshatit Berdin, në rajonin e Kurskut në Rusi, ku Ukraina e nisi një ofensivë të re më 5 janar.

Forcat ukrainase e nisën një ofensivë befasuese në Kursk në gusht, duke marrë kontrollin e disa territoreve. Që atëherë, ato kanë zmbrapsur përpjekjet e Rusisë për t’i dëbuar plotësisht.

Në anën tjetër, burimet zyrtare ruse kanë pretenduar se e kanë ndaluar ofensivën e re ukrainase.

Më 6 janar, Ministria e Mbrojtjes e Rusisë pretendoi se kishte shkatërruar tanket ukrainase rreth fshatit Berdin dhe se kishte parandaluar përparimin e tyre.

Gjatë kësaj kohe, blogjet pro luftës ruse gjithashtu raportuan nga zona.

Ndërkaq, eksperti izraelit ushtarak, David Gendelman, tha se ende nuk është e qartë se cili do të jetë synimi kryesor i sulmit. Por, ai shtoi se synimi mund të jetë sigurimi i një pozicioni të Ukrainës në Rusi.

“Nëse ka pasur direktivë politike për ta mbajtur atë pozicion, një sulm shtesë ka kuptim”, shtoi ai. “Veprimet luftarake janë gjithmonë një mënyrë për të realizuar një vendim politik”.

Derisa vendndodhja e betejës mund të përcaktohet, është më e vështirë të parashikohet se si do të zhvillohet ajo.

LEXONI GJITHASHTU:

• Zelensky i kërkon Perëndimit t’i heqë kufizimet në armë: Një sulm rus vret 6 njerëz
• Presidenti ukrainas Zelensky: Gati 15 mijë ushtarë rusë janë vrarë në Kursk