Altin Basha shkarkohet nga drejtimi i Teatrit Kombëtar

Altin Basha është shkarkuar këtë të enjte, nga posti i drejtorit të Teatrit Kombëtar. Vendimi u mor në mbledhjen e Këshillit të Ministrave, pas publikimit të disa pretendimeve në një emision investigativ për abuzime me fondet e institucionit nën drejtimin e Bashës.

Pas këtij skandali, Ministria e Ekonomisë, Kulturës dhe Inovacionit ndërmori një hetim për të verifikuar pretendimet e ngritura. Në një njoftim zyrtar të datës 23 dhjetor 2024, ministria njoftoi ngritjen e një grupi pune për të inspektuar menaxhimin financiar të Teatrit Kombëtar dhe për të vlerësuar përputhshmërinë me ligjin: “Ministria e Ekonomisë, Kulturës dhe Inovacionit ka ndjekur me vëmendje, sikurse me shqetësim, zhvillimet e fundit mbi kronikat e transmetuara nga një emision investigativ lidhur me menaxhimin në Teatrin Kombëtar. Për të garantuar transparencën dhe përgjegjshmërinë institucionale, më datë 23.12.2024, Ministria ka urdhëruar ngritjen e një grupi pune për të inspektuar situatën dhe aludimet e ngritura lidhur me disa aspekte të produksionit në Teatrin Kombëtar. Pas shqyrtimit të dokumentacionit dhe fakteve të raportuara, do të merren masat ligjore të nevojshme,” thuhet në njoftim.

Altin Basha, i cili u emërua drejtor i Teatrit Kombëtar në dhjetor të vitit 2022, pasoi Hervin Çulin në këtë detyrë. Gjatë karrierës së tij, Basha ka qenë një figurë e njohur e artit skenik, duke drejtuar për 17 vite një spektakël humori dhe duke shërbyer më herët si drejtues i Teatrit Eksperimental “Kujtim Spahivogli”.

LEXONI GJITHASHTU:

• Hapet teatri i kukullave, i pranishëm Rama e Gonzato: Të hapim sa më shumë hapësira
• Shpallet konkursi për drejtorin e përgjithshëm të TKOBAP, kriteret për aplikantët