Ish-presidenti Carter prehet pranë bashkëshortes së tij në Plains të Xhorxhias

Funerali i qytetit të lindjes së ish-Presidentit Carter u mbajt në Kishën Baptiste Maranatha të enjtën në mbrëmje, para se në shoqërinë e familjes dhe pastorit të tij ai të varrosej pranë gruas së tij të ndjerë Rosalynn Carter në Plains të Xhorxhias.

Kisha e vogël ofroi një kontrast të fortë me madhështinë e funeralit shtetëror të enjten në Katedralen Kombëtare të Uashingtonit. Pastori personal i ish-Presidentit Carter, Tony Lowden, theksoi besimin e thellë të krishterë të ish-Presidentit Carter, duke vënë në dukje vazhdimisht përkushtimin e tij ndaj mësimeve të Jezu Krishtit.

Pastori Lowden u bëri thirrje anëtarëve të kishës t’i bënin vetes dhe të tjerëve pyetjet që ai tha se Carter i bënte gjithmonë: “Ku ke qenë? Çfarë keni bërë? Kë keni ndihmuar? Dhe si mund t’ju ndihmoj?”

Pastori falënderoi infermieret që u kujdesën për ish-Presidentin Carter dhe të tjerët që ishin pranë tij gjatë jetës së tij.

Arkivoli i ish-Presidentit Carter u largua nga kisha në shoqërinë e këngëve të krishtera “It is Well With My Soul” dhe “Old Rugged Cross”.

LEXONI GJITHASHTU:

• Funerali për ish Presidentin Jimmy Carter zhvendoset në kryeqytetin amerikan
• Osmani e Kurti shprehin ngushëllime për vdekjen e ish-presidentit Jimmy Carter