“Albini darkoi me Memlin”, eksperti: Bashkëpunimi varet nga rezultati zgjedhjeve

Gjatë një bisedë në studion e emisionit “NOW me Erla Mëhillin”, eksperti i gjeopolitikës Kreshnik Osmani ka zbuluar disa detaje interesante rreth marrëdhënieve të liderëve të Kosovës, Albin Kurtit dhe Memli Krasniqit.

Sipas Osmanit, ka pasur një darkë mes dy liderëve të partive të ndryshme, ku është diskutuar për çështje politike.

“Kam informacione se Albin Kurti ka ngrënë një darkë me Memli Krasniqin të PDK-së. Darka ka shkuar mirë, kanë pasur një bisedë të mirë dhe kanë dalë të kënaqur. Madje, kanë ngrënë dhe ëmbëlsirë,” tha Osmani.

Megjithatë, Osmani theksoi se kjo marrëdhënie pozitive mes dy liderëve nuk do të ndikojë në rivalitetin politik mes partive. Sipas tij, konkurrenca politike mes tyre do të vazhdojë dhe përpjekjet për të fituar mbështetje do të mbeten të forta deri në fund të fushatës.

“Do të luajnë maksimalisht kundër deri në fund dhe çfarëdo që do të prodhojë rezultati, ai do të jetë busulla e një aleance të mundshme,” tha Osmani, duke paralajmëruar se çdo vendim për një bashkëpunim mund të varet nga rezultatet e zgjedhjeve.

Osmani gjithashtu komentoi përpjekjet e administratës amerikane për të ndërhyrë në çështjet e brendshme të Kosovës. Ai theksoi se ka një vullnet të shprehur Richard Grenell dhe Donald Trump për të nxjerrë ish-presidentin Hashim Thaçi nga burgu, duke e konsideruar këtë si një prej objektivave të politikës amerikane në rajon.

“Grenell dhe Trump kanë një qëllim për të nxjerrë Hashim Thaçin nga burgu. Ata kanë shprehur vullnetin amerikan për të çuar përpara mundësinë e nxjerrjes nga Haga të Thaçit,” tha Osmani.

Në këtë kontekst, Osmani tha se përpjekjet e administratës amerikane mund të çojnë në një formulë pajtimi kombëtar në Kosovë. Ai theksoi se ky proces mund të jetë një mundësi për stabilitetin politik të Kosovës, duke shtuar se përpjekjet amerikane do të shkojnë në drejtim të ruajtjes së një stabiliteti të mundshëm në vend.

“Nuk është i lehtë dobësimi ose rrëzimi i Kurtit, por nëse këto përpjekje do të shkojnë përpara, mund të shohim një formë të pajtimit kombëtar,” tha Osmani, duke sugjeruar se stabiliteti i Kosovës mund të jetë një interes i rëndësishëm për amerikanët.

LEXONI GJITHASHTU:

• “Kurti mund të mos jetë Kryeministër”, Beqa bën deklaratën e fortë!
• Fushata në Kosovë, aktivisti Gashi: Pse Albin Kurti ka zgjedhur të mos dalë në media