Kabineti i Sigurisë të Izraelit merr vendimin për armëpushimin në Gaza

Kabineti i Sigurisë të Izraelit ka rekomanduar miratimin e marrëveshjes së armëpushimit në Gaza.

Në një deklaratë për media të bërë nga zyra e kryeministrit Benjamin Netanyahu thuhet se miratimi vjen “pas shqyrtimit të të gjitha aspekteve politike, të sigurisë dhe ato humanitare” dhe me mirëkuptimin se marrëveshja “mbështet arritjen e qëllimeve të luftës”.

Kabineti rekomandoi gjithashtu që “qeveria të miratojë planin e propozuar”.

Marrëveshja tani do të kalojë në kabinetin e plotë për diskutim dhe votim.

Sipas mediave izraelite takimi për votimin është planifikuar të fillojë në orën 15:30 sipas kohës lokale.

Kryeministri Benjamin Netanyahu ka deklaruar se pengjet e para “priten të lirohen të dielën” në rast se marrëveshja miratohet. Megjithatë, ndërkohë që diskutimet vazhdojnë, sulmet ajrore izraelite në Gaza nuk kanë ndalur. Sipas agjencisë së mbrojtjes civile, 113 palestinezë janë vrarë që nga shpallja e marrëveshjes të mërkurën.

Konflikti filloi më 7 tetor 2023, kur Hamasi sulmoi Izraelin, duke vrarë rreth 1200 persona dhe duke marrë 251 pengje në Gaza. Ky akt nxiti një ofensivë masive nga ana e Izraelit, e cila deri më tani ka shkaktuar mbi 46.000 viktima palestineze, sipas ministrisë së shëndetësisë së drejtuar nga Hamasi.

Marrëveshja e armëpushimit konsiderohet një hap vendimtar për të ndaluar përshkallëzimin e dhunës dhe për të mundësuar lirimin e pengjeve.

LEXONI GJITHASHTU:

• “Nëse nuk do ishim ne…”- Trump merr meritat për armëpushimin në Gaza, reagon Biden
• Trump përshëndet marrëveshjen e armëpushimit në Gaza: U arrit falë fitores sonë