“Nëse nuk do ishim ne…”- Trump merr meritat për armëpushimin në Gaza, reagon Biden

Një marrëveshje për armëpushim në Rripin e Gazës, që përfshin shkëmbimin e pengjeve izraelite me të burgosurit palestinezë, është në pritje të miratimit nga kabineti i sigurisë së Izraelit. Marrëveshja, e shpallur nga SHBA dhe Katari, është parashikuar të hyjë në fuqi të dielën, vetëm një ditë para inaugurimit të Donald Trump për mandatin e tij të dytë presidencial.

Faza e parë e marrëveshjes parashikon një armëpushim 42-ditor, gjatë të cilit do të lirohen dhjetëra pengje të mbajtura në enklavën palestineze dhe rreth një mijë të burgosur palestinezë në Izrael. Më pas, palët do të negociojnë një marrëveshje për përfundimin e përhershëm të konfliktit.

Presidenti i sapozgjedhur, Donald Trump, ka marrë meritat për arritjen e kësaj marrëveshjeje. Në një intervistë për podcast-in Dan Bongino Show, ai tha se pa ndërhyrjen e tij dhe të ekipit të tij, duke përfshirë të dërguarin e ardhshëm për Lindjen e Mesme, Steve Witkoff, negociatat nuk do të kishin përfunduar kurrë.

“Nëse ne nuk do të ishim të përfshirë në këtë marrëveshje, ajo nuk do të kishte ndodhur kurrë. Ne e ndryshuam rrjedhën dhe e ndryshuam shpejt,” deklaroi Trump, duke shtuar se ishte me rëndësi që marrëveshja të mbyllej para inaugurimit të tij.

Nga ana tjetër, presidenti në largim, Joe Biden, ka kritikuar pretendimet e Trump, duke theksuar se marrëveshja e armëpushimit pasqyron kushtet që administrata e tij propozoi në maj. Në një intervistë për MSNBC, Biden tha se nuk kishte pasur kontakte me Trump për negociatat, duke shtuar se një marrëveshje e tillë ishte rezultat i përpjekjeve të vazhdueshme diplomatike.

“Marrëveshja mund të çojë në një fund të përhershëm të luftës,” tha Biden, duke shtuar se një përfundim i qëndrueshëm kërkon përfshirjen e të gjitha palëve në negociata afatgjata.

Kabineti i sigurisë së Izraelit pritet të takohet për të diskutuar kushtet e armëpushimit dhe të miratojë zbatimin e tij. Armëpushimi parashikon, ndër të tjera, tërheqjen e forcave izraelite nga zonat e populluara të Gazës, duke lehtësuar tensionet për një periudhë të përkohshme.

LEXONI GJITHASHTU:

• Pse agjencitë e inteligjencës janë në ankth për inagurimin e Trump
• Trump përshëndet marrëveshjen e armëpushimit në Gaza: U arrit falë fitores sonë