Ndarja nga jeta e Kryepeshkopit Janullatos, reagon kryeministri grek

Kryeministri i Greqisë, Kyriakos Mitsotakis, ka shprehur ngushëllimet për ndarjen nga jeta të Kryepeshkopit të Tiranës, Durrësit dhe gjithë Shqipërisë, Anastas Janullatos. Në një reagim në rrjete sociale, Mitsotakis e cilësoi Kryepeshkopin si një figurë të shquar shpirtërore dhe një pionier të Kishës Ortodokse në Shqipëri, i cili ndërthurte besimin e palëkundur me një veprimtari të theksuar humanitare.

“Kryepeshkopi Anastas ishte një urë komunikimi mes popujve, një mbrojtës i paqes dhe një shërbëtor i përkushtuar i të drejtave të njeriut. Ai la një trashëgimi të çmuar jo vetëm për Ortodoksinë, por për mbarë helenizmin,” tha Mitsotakis.

Mitsotakis vlerësoi rolin e Anastas Janullatos në mbrojtje të të drejtave të njeriut, si Kryepeshkop i parë i Kishës Ortodokse Autoqefale të Shqipërisë pas një periudhe të gjatë ndalimi të fesë. Mitsotakis nënvizoi se veprat dhe urtësia e tij do të vazhdojnë të frymëzojnë brezat e ardhshëm.

“Sepse Anastasi ishte në të njëjtën kohë një njeri shpirtëror dhe një shërbëtor aktiv i njeriut dhe i të drejtave të tij. Ai ishte një avokat i fëmijëve në Afrikë dhe një bashkëpërfaqësues i studentëve grekë që i rezistuan diktaturës. Sigurisht ai ishte dhe pionier i Kishës Ortodokse në Shqipëri. Kryepeshkopi i parë atje dhe luftëtari i parë për interesat e homogjenisë sonë kombëtare.

Pata fatin të takoj dhe të bashkëpunoj me Priftin, i cili ndërthuri dinamizmin e besimit me butësinë e natyrshme. Një personalitet që u bë urë komunikimi mes dy vendeve. Këto janë karakteristika që e bëjnë më të rëndë pikëllimin tonë. Por trashëgimia e Kryepeshkopit është edhe më e vlefshme për të gjithë”, shkroi Mitsotakis.

Kryeministri grek shton se: “Sot vajtojmë humbjen e një njeriu të madh, por nesër do të frymëzohemi nga drita e shpresës që ai përçonte. I përjetshëm qoftë kujtimi i tij,” përfundoi kryeministri grek.

LEXONI GJITHASHTU:

• Ndahet nga jeta Kryepeshkopi i Shqipërisë Anastas Janullatos
• Vdekja e Kryepeshkopit Anastas, reagon Begaj: Humbje e madhe për Kishën e Shqipërinë