Presidenti Bajram Begaj ka shprehur ngushëllimet për humbjen e Kryepeshkopit Anastas, duke e vlerësuar atë si një udhëheqës të madh shpirtëror dhe figurë të shquar të Kishës Ortodokse Autoqefale të Shqipërisë.
Ai theksoi se Kryepeshkopi Anastas udhëhoqi Kishën me mençuri dhe përkushtim, duke kontribuar në forcimin e saj dhe në krijimin e një rruge të re për besimin ortodoks shqiptar, sidomos pas periudhës së vështirë që kaloi vendi.
“Shqipëria humbi sot Fortlumturinë e tij, Kryepiskopin e Tiranës, Durrësit dhe të gjithë Shqipërisë, Prof. Dr. Anastasin, udhëheqësin shpirtëror dhe figurën e shquar të Kishës Ortodokse Autoqefale të Shqipërisë.
Gjatë udhëheqjes së tij, Fortlumturia e tij ka udhëhequr Kishën me mençuri, përkushtim dhe dashuri për njerëzit, duke kontribuar në forcimin e saj dhe në krijimin e një rruge të re për besimin ortodoks shqiptar, veçanërisht pas periudhës së vështirë të kaluar.
Ai ishte një shembull i palodhur i përkushtimit shpirtëror dhe një udhërrëfyes për të gjithë ata që e ndoqën.
Në këtë moment të dhimbshëm, shprehim ngushëllimet tona më të thella për Kishën dhe për gjithë besimtarët, që humbën atin dhe kryebariun e tyre, një udhëheqës të dashur dhe të nderuar.
Trashëgimia e Fortlumturisë së tij do të mbetet gjithmonë e gjallë në zemrat e atyre që e nderuan dhe e donin.
Lutemi që Zoti t’i dhurojë prehjen në tendat e të drejtëve dhe qoftë kujtimi i tij i përjetshëm!
LEXONI GJITHASHTU:
- Ndahet nga jeta kryepeshkopi i Shqipërisë Anastas
- “Alarm i kuq”, kryepeshkopi Anastas në gjendje shumë të rëndë
