Sekretari Rubio: Shtetet e Bashkuara do të mbështesin Kosta Rikën

Sekretari i Shtetit Marco Rubio premtoi të martën mbështetjen e Shteteve të Bashkuara për të forcuar sigurinë kibernetike të Kosta Rikës, infrastrukturën e telekomunikacionit 5G dhe betejën e saj kundër narkotikëve.

Ai i bëri komentet në një konferencë të përbashkët për shtypin me presidentin e Kosta Rikës Rodrigo Chaves. Ky vend i Amerikës Qendrore përballet me më shumë se 100 milionë sulme kibernetike në vit.

“Është shumë serioze, përballja e një vendi të tillë me 110 milionë sulme kibernetike në vit është e jashtëzakonshme dhe ata e kanë përballuar me shumë guxim”, tha Sekretari Rubio në San Jose, kryeqyteti i Kosta Rikës.

Në fund të vitit 2024, media lokale raportoi se zyrtarët e Kosta Rikës, në bashkëpunim me ambasadën e Shteteve të Bashkuara, identifikuan ndërhyrje kibernetike nga grupe kriminale në Kinë që kishin në shënjestër sistemin e telekomunikacionit dhe teknologjisë së vendit, një pretendim që Ambasada Kineze në Kosta Rika e mohoi.

Sekretari Rubio ishte në El Salvador të hënën, ku takoi Presidentin Nayib Bukele dhe nga ku njoftoi se zoti Bukele i kishte ofruar të pranonte të dëbuarit nga Shtetet e Bashkuara, pavarësisht shtetësisë së tyre.

Ai po ashtu ka ofruar të bëjë të njejtën gjë me kriminelët që aktualisht janë në burg dhe po vuajnë dënimet në Shtetet e Bashkuara edhe në rastet kur janë shtetas amerikanë apo kanë leje qëndrimi

Sekretari Rubio tha se El Salvadori do të bashkëpunojë plotësisht për të riatdhesuar shtetasit e vet të cilët janë pa dokumenta në Shtetet e Bashkuara, duke e quajtur marrëveshjen “më të jashtëzakonshmen për imigrimin në botë”.

LEXONI GJITHASHTU:

• Sekretari Rubio viziton Kosta Rikën dhe Guatemalën, temë imigrimi dhe siguria
• Rubio: Panamaja të zvogëlojë ndikimin e Kinës ose të përballet me masa nga SHBA