Shqipëria përmirësim në raportin e Transparency International për korrupsionin

Në luftën kundër korrupsionit gjatë vitit 2024, Shqipëria ka një rritje prej 5 pikësh krahasuar me vitin 2023 sipas raportit të Transparency International.

Në renditjet globale të Indeksit të Perceptimit të Korrupsionit, vendi ynë është rritur plot 18 vende duke u renditur i 80-ti nga 180.

Kjo është rritja më e madhe për Shqipërinë e cila është vlerësuar me 42 nga 100 pikë të mundshme.

Ajo çfarë i ka ngritur pikë Shqipërisë gjatë vitit të kaluar është Prokuroria dhe gjykata e specializuar kundër korrupsionit, të cilat kanë dënuar ish-ministra, deputetë dhe kryebashkiakë, një proces që ka ndihmuar institucionet e drejtësisë të fitojnë besimin e qytetarëve, thuhet në raport.

Në vitin 2023, Shqipëria u vlerësua me 37 pikë dhe renditej i 98-ti nga 180 vende.

Ajo çfarë vihet re në raport është se edhe Kosova ka pasur përmirësim në luftën ndaj korrupsionit, pasi ka pasur një rritje me 3 pikë duke u vlerësuar me 44 pikë.

Sa i përket situatës globale, Transparency International thotë se korrupsioni vazhdon të rrënojë Evropën Lindore dhe Azinë Qendrore, me një mesatare rajonale që mbetet një nga më të ulëtat në Indeksin e Perceptimit të Korrupsionit në 35 nga 100.