Realin e ndëshkon një “ish”, “Los Blancos” përmbysen nga Betis

Reali i Madridit është mposhtur në mënyrë surprizë nga Betis në La Liga me përmbysje. Dueli u mbyll në shifrat 2-1, ndërsa nga kjo ndalesë përfituan rivalët e qytetit, Atletiko.

Transferta ndaj Betis rezultoi më e vështirë nga sa pritej për Realin e Madridit i cili u mposht në shifrat 2-1. Los Blancos e nisën mirë përballjen dhe dhanë idenë se do të ishin 3 pikë të lehta, por vendësit arritën të barazojnë e më pas përmbysin kundërshtarin, duke i shkaktuar kështu humbjen e 4ët në La Liga. Diaz zhbllokoi shifrat në minutën e 10 duke kaluar përpara galaktikët, teksa pjesa e parë do të mbyllej në ekuilibër pas golit të Cardoso.

Në fraksionin e dytë vendësit ishin më kërkues, ashtu si gjatë gjithë takimit, ndërsa shënuan golin e dytë me ish-madrilenin Isco me penallti. Minutat në vijim nuk sollën më ndryshime duke bërë që Betis të fitojë 2-1 përballë pretendentëve të La Liga e dhënë një assist Atleticos së Madridit që e shfrytëzoi më së miri.

Mbrëmjen e së shtunës, el colchonero kishin një duel të vështirë ndaj Bilbaos, të cilët e mposhtën minimalisht. Mjaftoi një gol i yllit argjentinas Julian Alvarez për të marrë 3 pikët e prekur përkohësisht vendin e parë. Gara për kreun në La Liga sa vjen e bëhet më e bukur, ku Reali, Barcelona e Atletico luftojnë me njëra-tjetrën për titullin kampion.