Ish-nënkryetari i FRPD: Jemi në krizë dhe duhet ta pranojmë këtë

Pasdites e sotme është zhvilluar një protestë e mbështetësve të Partisë Demokratike kundër kreut të kësaj partie, Lulzim Basha.

Gazetari i Euronews Albania, Renaldo Salianji, raportoi se kjo protestë është organizuar nga ish-nënkryetari i FRPD, Lisandër Hoxha.

Të vendosur para selisë blu, z. Hoxha u shpreh se demokratët pas humbjes së zgjedhjeve ndodhen në krizë dhe kjo duhet pranuar nga të gjithë.

“Ftova demokratët që të ishin pjesë e dëgjesës këtu. Zgjedhjet treguan se ndodhemi në një krizë shumëplanshe në PD. Që kemi krizë këtë e tregojnë demokratët e zhgënjyer. Ne jemi në krizë dhe duhet ta pranojmë këtë”, tha ai.

Ish-nënkryetari i Forumit Rinor në Partinë Demokratike tha se tejkalimi i situatës aktuale fillon duke pranuar krizën dhe duke shpalosur platformat komunikuese të zgjidhjes brenda partisë.

“Kjo është partia e lirisë dhe parti e sakrificës, është parti e cila promovoi demokracinë në Shqipëri. Ne e duam të gjithë këtë shtëpi, ndaj i ftoj të gjitha palët, hajde të ulemi dhe të shpalosim platformat tona se si të shkojmë në fitore”, shtoi ai.

Ditën e sotme ka pasur një sërë takimesh në selinë blu. Fillimisht, grupi i juristëve të PD janë mbledhur për të dokumentuar disa nga shkeljet gjatë fushatës dhe numërimit të votave. Takim tjetër ishte ai i kryetarit Basha me drejtues të qarqeve Shkodër, Korçë, Fier e Elbasan.

Ndërkohë gjatë orëve të pasdites, një delegacion nga ambasada sllovene ka zhvilluar një takim me sekretarin për punët e jashtme në PD.