LSI përkrah grevistëve, Kryemadhi letër 4 institucioneve për zbardhjen e përgjegjësive

Ditën e sotme, kryetarja e Lëvizjes Socialiste për Integrim, Monika Kryemadhi i ka dërguar një letër Prokurorit të Përgjithshëm, kryetarit të KLSH-së, ministres së Infrastrukturës dhe Avokates së Popullit, me anë të së cilës iu kërkon që të marrin masa për t’i dhënë fund grevës së urisë të punëtorëve të ujësjellësit të Poçemit, i cili furnizon qytetin e Ballshit dhe disa njësi administrative rreth tij.

Sipas këtij dokumenti, punonjësit e ujësjellësit të Poçemit nuk kanë marrë pagat prej 27 muajsh, gjë që ka shkaktuar një gjendje të rëndë ekonomiko-sociale të familjeve të tyre dhe që i ka detyruar ata të futen në ditën e katërt të grevës së urisë.

“Kërkoj nga ju verifikimin dhe zbardhjen e të gjitha veprimeve dhe mosveprimeve të agjencive shtetërore si Ministria e Infrastrukturës dhe Energjisë, përgjegjësit e këtyre veprimeve dhe vënien e tyre përpara përgjegjësive ligjore”, – thuhet në fund të letrës që kryetarja e LSI ia ka adresuar sot z. Olsian Çela, z. Bujar Leskaj, znj. Belinda Balluku dhe znj. Erinda Ballanca.

Një muaj më parë punonjësit nisën protestat duke filluar me fikjen e nënstacionit çka shkaktoi ndërprerjen e ujit të pijshëm për 1 orë në gjithë Mallakastrën. Por tani duket se mjeti i vetëm që u ka mbetur për të marrë atë që u takon është greva e urisë.