Vrasja e ish-kryeministrit, gjykata shpërbën Kishën e Unifikimit në Japoni

Një gjykatë në Tokio ka urdhëruar shpërbërjen e kishës së Unifikimit në Japoni, pas një kërkese të qeverisë së vendit.

Kisha, e cila njihet zyrtarisht si Federata e Familjes për Paqen dhe Bashkimin Botëror, u vu nën një kontroll të shtuar pas vrasjes së ish-kryeministrit Shinzo Abe në vitin 2022.

Vrasësi i supozuar pretendon se kisha falimentoi nënën e tij dhe fajësoi Abe për lidhjen e partisë së tij me të.

Ministria e Arsimit e Japonisë kërkoi shpërbërjen e kishës në vitin 2023, duke pretenduar se ajo kishte dëmtuar ndjekësit e saj dhe familjet e tyre përmes taktikave manipulative të mbledhjes së fondeve dhe rekrutimit.

Si pjesë e kërkesës së tij, departamenti qeveritar dorëzoi 5000 dokumente dhe prova në gjykatë, bazuar në intervistat me më shumë se 170 persona.

Në vendimin e saj për këtë çështje, Gjykata e Qarkut të Tokios njoftoi të martën se po revokonte statusin ligjor të sektit fetar me bazë në Korenë e Jugut, pasuesit e të cilit njihen jozyrtarisht si Moonies. Ky emër rrjedh nga ai i themeluesit të kishës, mesia dhe i vetëshpallur Sun Myung Moon.

Nëse grupi nuk arrin të apelojë me sukses vendimin, ai do të humbasë privilegjin e tij s i përjashtuar nga taksat dhe do të duhet të likuidojë asetet e tij në Japoni.

Kisha, e cila ka treguar se po shqyrton një apel, e quajti vendimin e së martës “absolutisht të papranueshëm”, duke pretenduar se gjykata kishte dhënë “një interpretim të gabuar ligjor”.

Kjo është hera e parë që një grup fetar në Japoni i është nënshtruar një urdhri revokimi sipas kodit civil të vendit.

Kisha e Unifikimit, e cila u themelua në Seul në vitin 1954, mori statusin ligjor në Japoni në vitet 1960, një lëvizje që thuhet se është mbështetur nga gjyshi i Abe, ish-kryeministri Nobusuke Kishi.

Pas vrasjes së Abe në një tubim fushate, një qendër e vëmendjes u vu mbi lidhjet e kishës me Partinë Liberal Demokratike në pushtet.

Një riorganizim i kabinetit në vitin 2022 nga kryeministri i atëhershëm Fumio Kishida hoqi shtatë zyrtarë me lidhje me kishën, përpara se Ministri i Ekonomisë Daishiro Yamagiwa të jepte dorëheqjen për lidhjet e tij me sektin.

LEXONI GJITHASHTU:

• Japonia nderon Shinzo Abe, mbahet mes protestash eventi i kontestuar shtetëror
• Mijëra qytetarë dhe liderë botërorë në homazhet për Shinzo Abe