Shkencëtarët po studiojnë mbretëreshat e bletëve për sekretin e jetëgjatësisë

Shkencëtarët e agjencisë kërkimore Aria, e cila financohet nga qeveria britanike me 800 milionë paund, do të hetojnë potencialin e mbretëreshave në kolonitë e bletëve për zbulimin e mundshëm të terapive që mund të zgjasin jetën e njeriut si pjesë e projektit të tyre, njoftuan sot mediat britanike.

Mbretëreshat, të cilat kanë ADN identike me bletët punëtore, por ende jetojnë shumë më gjatë, kanë tërhequr prej kohësh vëmendjen e shkencëtarëve, të cilët pyesin veten nëse mund të fshehin sekretin e jetëgjatësisë dhe pjellorisë, shkruan “Guardian”.

Qëllimi i projektit ambicioz shkencor është të hetojë biologjinë e bletëve për të përcaktuar se çfarë i ndihmon mbretëreshat të mbijetojnë me vite dhe të jenë pjellore, ndërsa punëtorët jetojnë vetëm disa muaj në rastin më të mirë.

Agjencia Aria merret me projekte të vlefshme, por edhe të rrezikshme, të cilat mund ta ndryshojnë shoqërinë për mirë, sipas gazetës britanike.

“Janë këto ide paksa të çmendura që kanë potencialin për të transformuar vërtet jetën e të gjithëve”, thotë një nga tetë drejtorët e programit të agjencisë, Janik Wurm.

Wurm, i cili më parë ka punuar si profesor i gjenomisë evolucionare dhe bioinformatikës në Universitetin Queen Mary të Londrës, do të drejtojë një projekt për të studiuar bletët, grerëzat, milingonat dhe termitet që mund të japin rezultate të dobishme për shëndetin e njeriut.

“Nëse arrijmë të zbulojmë dhe shfrytëzojmë mënyrat se si natyra zgjidh sfidat me të cilat përballen bletët, mund të sjellë një transformim në ndalimin e procesit të plakjes dhe përmirësimin e fertilitetit tek njerëzit, si dhe zgjidhje të reja në luftën kundër sëmundjeve”, tha ai.

LEXONI GJITHASHTU:

• Jetëgjatësia në Evropë po bie – Studimi i ri zbulon arsyet
• Studimi: Pirja e kafesë mund të rrisë jetëgjatësinë me gati dy vjet